Өвөрмөц хэрнээ чадалтай хоолойгоороо алдар нэр нь дэлхийд түгсэн дуучин бол Адель. Түүнээс өөр нэг дор Грэммийн шагналыг зургаагаар нь түүж байсан дуучин үгүй. Алдарт дуучин Адель, түүний нөхөр Саймон Конеки нар бяцхан хүүгээ өлгийдөж авснаас хойш сар ч болоогүй байна. Адель амаржихаасаа өмнө олны нүднээс хэсэгтээ л далд байсан юм. Гэвч түүнийг алдарт сэтгүүлч Андерсон Күүпер “60 минут” ярилцлагын нэвтрүүлэгтээ оруулж амжсан билээ.
Адельтэй ярилцлага хийж байсан сэтгүүлчид түүний бие, галбирын талаар огтхон ч асууж байгаагүй. Тэгвэл “60 минут”-ын үеэр сэтгүүлч түүнээс өөрийнхөө галбирт яагаад санаа зовдоггүй юм бэ гэж асуужээ. Учир нь өнгөрсөн хоёрдугаар сард Карл Лэжерфийлд “Метро” сонинд өгсөн ярилцлагадаа “Тэр 24 настай гэхэд арай л тарган” гэж хэлсэн нь тухайн үедээ хэвлэлүүдийн өлгөж авсан шуугиан байсан юм. Күүперийн асуултад дуучин бүсгүй юу гэж хариулсныг нэвтрүүлгээс нь хөрвүүлэн хүргэж байна.
-Алдартай дуучин бүсгүйчүүд бүгдээрээ л атаархал төрүүлмээр гоё биетэй байдаг. Рианна, Бионсе гээд л. Чи өөрийн бие галбирын талаар ямар бодолтой явдаг вэ?
-Миний хувьд энэ огтхон ч асуудал биш. Би хэзээ ч, хэзээ ч шүү. Энэ талаар огтхон ч бодож байгаагүй. Энэ бол надад тулгарсан асуудал гэж бодож ч байсангүй.
-Сайхан хүүхнүүдийн зургийг хараад атаархдаггүй гэж үү?
-Үгүй дээ. Хэзээ ч үгүй. Би ер нь гоё өнгөтэй, сайхан хүүхнүүдтэй сэтгүүл үзээд байдаггүй шүү. Миний хувьд скинни жинс, секси хувцас огтхон ч сонин биш. Би өөртөө таарсан, дэгжин, донжийг нь олсон хувцасаар хаана ч гоёчихож чадна. Би өөртөө л таалагдаж байвал бусад нь хамаагүй гэж боддог. Бас би өөрийгөө чадварлаг залуу бүсгүй гэдгийг харуулчихаж чадна гэж бодож байна.
-Магадгүй турах талаар бодож байгаагүй гэж үү дээ?
-Турах тухай бодож байгаагүй гэж би хэлээгүй шүү. Зөвхөн өөрийн бие галбирыг муухай гэж хэзээ ч боддоггүй. Хүүхнүүдэд би ингэж хэлмээр санагддаг. “Чи өөрийгөө аз жаргалтай л байлга. Тэгвэл чиний бүх юм чамд аяндаа таалагддаг болно”.
Орчуулсан Б.Солонго
