Дэлхийн яруу найрагчдын баярын өдөр өнөөдөр тохиож байна. 1999 оноос хойш дэлхий нийтээрээ тэмдэглэж ирсэн энэ өдрийг тохиолдуулан Монголын Зохиолчдын Эвлэлийн “Яруу Найргийн Үндэсний Төв”-өөс санаачлан зохиолчдын “Анхны номын үзэсгэлэн”-г зохион байгуулж байгаа юм.
Уг арга хэмжээг ССАЖЯам санхүүжүүлж, Хүүхдийн номын ордон хамтран зохион байгуулж байгаа бөгөөд нийт 321 анхны номыг дэлгэн тавих ажээ. Үзэсгэлэнгийн үеэр зохиолчдын анхны шүлгийг уншуулж, анхны зохиолынх нь талаар хүрэлцэн ирсэн хүмүүстэй нээлттэй ярилцах бол зохиолчид өөрсдийн номоо дуудлага худалдаанд оруулан борлуулах гэнэ.
Мөн зөвхөн зохиол, яруу найргаас гадна уран зохиолын орчуулагчдын анхны орчуулгын номыг ч эндээс үзэж болох аж. “Анхны номын үзэсгэлэн” өнөөдөр 11.00 цагаас Хүүхдийн номын ордонд нээлтээ хийж өнөөдөр маргааш хоёр үнэ төлбөргүй болох юм. Дашрамд сонирхуулахад, Ардын уран зохиолч, яруу найрагч Б.Лхагвасүрэн “Уянгын тойрог” нэртэй анхны номоороо Төрийн шагнал хүртэж байжээ.
Ийнхүү яруу найрагчиддаа халуун баярын мэнд хүргье.
www.URLAG.mn
