Хип хоп холбооны тэргүүн Баавар буюу Ш.Батбаяр ШШГЕГ-ын харьяа цагдан хорих 461-р ангид хоригдож байгаад түлэгдсэнтэй холбогдуулан Монголын дуу бүтээгч үндэсний төвийн гишүүд, уран бүтээлчид хэвлэлийн бага хурал хийсэн билээ. Энэ үеэр Дижитал хамтлагийн гишүүн Эркагийн хэлсэн үг сэтгүүлчдийг алмайруулав.Тэрбээр "Монгол улсын Ерөнхийлөгч новш, УИХ-ын гишүүд новш, хуульчид новш, багш нар новш, сэтгүүлчид новш" гэж хэлсэн. Тэрхүү үгээ ийн тайлбарласан юм. Бид монгол хүн, монгол хүнээ хайрлах юм бол эх хайрлаж байна гэж би ойлгодог. Бид гуравхан сая монголчууд. Хүний амьдралын мөчлөгөөр Бааварыг сүүлийн арван жил юу хийв гэж тооцоод үзье.
Сүүлийн арван жилийн хугацаа буюу 3650 хоног Баавар юу хийсэн гэхээр 650 хоногийг магадгүй Баавар тамхи татаж, хүнтэй маргалдаж, хааяа зодоон ч хийж явсан байх.Манай хүн чинь архи уудаггүй юм чинь нэг иймэрхүү л юм хийж явсан байх. Тэгвэл 3000 хоногт нь тайзан дээр дуулж, шүлэг бичиж, бүжиглэж, тоглолт зохион байгуулж явсан, залуучуудынхаа оюуны хөрөнгө оруулалтад хувь нэмрээ оруулж, Монгол орныг тойроод, Монгол эх нутгаараа уран бүтээлчдийг дагуулаад дуу дуулж явсан, хүүхдээ хүмүүжүүлсэн, ханиа халамжилсан, ээждээ сүү цайг нь талхыг нь дөхүүлж өгч байсан, инээж наргиж явсан. Ингээд 650 хоногийн харыг нь харчихаад 3000 хоногийн цагааныг нь яагаад харахгүй, тэрнийг нь тодотгож чадахаа больчихсон ийм ухамсартай болчихсон юм бэ. Бид яагаад цагааныг хэзээ ч харж чадахаа болив. Бид энэ мэтчилэн бие биенийгээ новш гэж хардаг болчихож. Тиймээс бид новш гэсэн юм.
www.URLAG.mn
