Монгол эх орны өргөн уудам нутагт тархан оршсон түүх соёлын өв дурсгалыг судлах, хамгаалахад бүх нийтийн оролцоог идэвхжүүлэх, судалгаа шинжилгээний сан хөмрөгийг арвижуулах, цаашид байгаль, түүх соёлын өвд аялал жуулчлалыг хөгжүүлэхэд туслах зорилготой "Сувдан Сондор" найм дахь удаагийн соёл эрдэм шинжилгээний аялал Дорноговь аймгийн нутагт 5-р сарын 17-оос 27-ны өдрүүдэд болно.
Энэхүү хөтөлбөр хэсэг хугацаанд завсарласны эцэст ийнхүү Говийн V ноён хутагт Данзанравжаагийн мэлмий гийсний 210 жилийн ойн хүрээнд Дорноговь аймгийн нутгаар аялж байна.
Энэ аялалын хөтөлбөрийг анх яруу найрагч Г.Мэнд-Ооёо, ардын уран зохиолч С.Эрдэнэ, ардын зураач Н.Цүлтэм, академич Д.Цэрэнсодном, археологич Д.Наваан тэргүүтэй соёл, шинжлэх ухааны зүтгэлтнүүд санаачилжээ. Энэхүү эрдэм шинжилгээний аялалын бүрэлдэхүүнд Монголын Соёл яруу найргийн академийн ерөнхийлөгч, зохиолч, яруу найрагч Г.Мэнд-Ооёо, Дэлхийн урлаг соёлын академийн байнгын гишүүн, доктор, профессор С.Дулам, НҮБ-ийн био ёс зүйн шинжээч, системийн онол судлаач, доктор, профессор Б.Болдсайхан, Биологийн ухааны доктор, профессор Ц.Жамсран, нэрт судлаач, соёлын гавьяат зүтгэлтэн, профессор Г.Гонгоржав, шашин судлаач, гавж, доктор Ш.Сонинбаяр, Лувсанданзанравжаа академийн ерөнхийлөгч, доктор З.Алтангэрэл, палентологич, доктор, профессор Х.Цогтбаатар, Европын мэргэжлийн зураачдын Академийн шагналт зураач Н.Санчир, МУИС-ийн багш, археологич, докторант Б.Бадрах, палентологич, эрдэм шинжилгээний ажилтан Б.Майнбаяр, Соёл Яруу Найргийн Академийн ажилтан, докторант О.Мөнхнаран нарын 20 гаруй Монголын нэр хүндтэй эрдэмтэн судлаач, уран бүтээлчид, Дорноговь аймгийн Засаг даргын Тамгын газрын ажлын албаны баг оролцсон нийт 30 гаруй хүн нэгджээ.
Аялагчид есдүгээр сард аялалынхаа үр дүнгээр “Сувдан Сондор – 8” үзэсгэлэн, эрдэм шинжилгээний хурал зохион байгуулж, тусгай ном хэвлүүлэхээр төлөвлөжээ. Түүнчлэн “Сувдан Сондор-8” аялалд Монголын үндэсний олон нийтийн телевизийн сэтгүүлч, СГЗ Ш.Ёолк, найруулагч, зураглаач н.Чинбат, Монголын Үндэсний олон нийтийн Радиогийн яруу найрагч О.Цэнд-Аюуш , “Өнөөдөр” сонин сэтгүүлч, яруу найрагч Т.Нипонь, гэрэл зурагчин н. Адилбиш нар мэдээллийн түншлэгчээр хамтран оролцож байна.
Та бүхнийг урлагийн тэнгэр ивээг…
www.URLAG.mn
