Бид энэ удаад “Mobile photo”-гоор “Номин талст” хамтлагийн залуусын дараах зургийг онцолж байна. Эдгээр залуусаас эрч хүч, залуу насны гал цог эрхгүй харагдана.
Одоогоос 16 жилийн тэртээ дуучин болох хүсэл мөрөөдлөөрөө жигүүрлэсэн дөрвөн залуус “Номин талст” хамтлагийг үүсгэн байгуулж, урлагийн ертөнцөд шинэ хамтлаг бий болсоныг зарласан билээ. Тэдний анхны уран бүтээлүүд болох “Намрын хонгор салхи”, “Сүүлчийн удаа”, “Бид”, “Дурласан сэтгэл” зэрэг дуунууд нь тухайн цагтаа залуусын хамгийн сонсох дуртай хит дуунууд болж чадсан билээ.
Тэд уран бүтээл хийгээд удаагүй байх үедээ буюу 1998 онд “Гэрэл сүүдэр” тоглолтоо хийж, тэр жилдээ “Пентатоник” наадмаас “Шилдэг дебют” шагнал авсанаар Монголын рок попын ертөнцөд “Номин талст” хамтлаг тодоор бичигдэж эхэлсэн түүхтэй.
Түүнээс өнөөг хүртэл уран бүтээл туурвихдаа олон олон үзэгч фенүүдтэй болж, хийсэн бүтээснээрээ эрхгүй ялгарч байсан юм. Өнгөрсөн жил тэд 15 жилийн ойн тоглолтоороо үзэгч олондоо мэндчилж, бас нэгэн түүхийг хамтдаа бичсэн билээ.
Хамтлагийн залуус өөрсдийн уран бүтээл, хувийн амьдралдаа анхаарч нам гүмхэн амьдарч байгаа хэдий ч тэдний дуу, уран бүтээлүүд нь мөнхийн настай, мөнхийн сонсогчтой байгаа юм. Чанартай, чансаатай уран бүтээл он цагийн урсгалд ч мөнхөрч үлддэг жамтай.
Б.Хорлоо