Ар хөвчийн эх ууланд
Азарган чоно улихад
Алтан соёмбын хос загас хөөрөн бүжиж
Аугаа Монголын минь сүлдэн сэргэдэг ээ гэдэгт би итгэдэг
Амрагийн дуунд уяран ухаажиж
Амьдрал цогцолдог гэдэгт би итгэдэг
Түүхийн нугчаанд бидэрсэн буурал шаштираас үнэн балардаггүй гэдэгт би итгэдэг
Туг шиг дэрвэсэн Монгол хүний ухааных нь золбоонд дэлхий сөгдсөн гэдэгт би итгэдэг
Надаас болж цохилт нь түргэсдэг зүрх байдаг гэдэгт би итгэдэг
Намирсан үүлсээ тэргүүндээ зангидчихдаг уулс минь
Намайг сэтгэл гундуухан явахад салхиараа аргадна гэдэгт би итгэдэг
Найраг бичих гэгээн хүслийг минь тэнгэр хөглөдөг гэдэгт би итгэдэг
Билгүүн ухаант өвгөд минь дээрээс харж ивээдэг гэдэгт би итгэдэг
Бойтогны минь хонхон дуу муу бүхнийг зайлуулсан гэдэгт би итгэдэг
Буцах шувуудын гуниг будрах цасан болдог гэдэгт би итгэдэг
Бурханы илгээсэн билэг хүүхэд болон мэндэлдэг гэдэгт би итгэдэг
Шуранхайлан цахилах уртын дууны айзамд тал нутаг минь тайвширдаг гэдэгт би итгэдэг
Шуналын хар мананд хүн чанар төөрөн сульддаг гэдэгт би итгэдэг
Шүүдэр хундагалсан гоо цэцэгсийн зөөлөн шаргиа хайрын симфони эгшиглүүлдэг гэдэгт итгэдэг
Шимтэй жимсний охь үнэрийг дайсан салхи цэцэг болгонд түгээдэг гэдэгт итгэдэг
Амгайн чимээтэй талд минь наран хургаж,хөндөгдсөн хөрс нь эдгэрнэ гэдэгт би итгэдэг
Алтан ургийн хүчирхэг ариун цустангууд төрд цойлно гэдэгт би итгэдэг
Ард түмний минь дунд амар амгалан энхжин оршино гэдэгт би итгэдэг
Ахуй Монгол улс минь нэг л өдөр тулгын гурван ухаанаар сэргэн мандана гэдэгт би итгэдэг
www.URLAG.mn
