“Болор цом” наадмын тэргүүн шагналт, модернист яруу найрагч Б.Галсансүх Македон улсад зохиогдож буй дэлхийн яруу найрагчдын 62 дугаар фестивальд оролцож байна.
Тэрээр орон орны яруу найрагчдад зориулан англи, монгол хэлээр шүлгээ уншиж сонирхуулах гэнэ. Дэлхийн яруу найрагчдын их чуулганд манай улсаас өмнө нь яруу найрагч Г.Мэнд-Ооёо, Г.Аюурзана, Дан.Нямаа, Ц.Бавуудорж, зохиолч Б.Золбаяр, нэрт гүүш Ж.Гэндэндарам нар оролцож байжээ.
Энэ жилийн фестивальд уригдсан модернист найрагч маань дэлхийн олон орны “тэнгэрийн харьяат”-уудад англи, монгол хэлээр шүлгээ уншиж сонирхуулж байгаа аж.
Газар газраас хүрэлцэн ирсэн яруу найрагчид шүлэг дууллаа уншиж түүн дундаас “Алтан титэм”-ийн эзнийг тодруулдаг гэнэ. Ийнхүү “Алтан титэм” хүртсэн найрагч өөрийн нэрэмжит модоо Струга хотын “яруу найргийн цэцэрлэгт хүрээлэн”-д тарьдаг юм байна.
Тэрхүү цэцэрлэгт Андрей Вознесенский, Аллэн Гинзбэрг, Иосиф Бродский, Нобелийн шагналт зохиолч Шиймус Хээни, Томас Транстрүмэр нарын тарьсан модод өдгөө ч өтгөн саг¬лагар навчсаараа намрын зөөлөн салхийг хөглөж, найраг шүлгийн онгод хөгжөөн байдаг гэнэ.
Түүний уран бүтээлийн хэсгээс …
Гэгээн гуниглал
Гэгээн гуниглал минь
Гадны хүн орж болохгүй гэсэн бичигтэй тэнцүү.
Тунгалаг инээд минь
Тамирдсан сэтгэлийг минь илааршуулахгүй.
Ариун хайр минь
Авсанд орсон хойно үнэд орно.
Харанхуй ганцаардлыг минь
Хэн ч анзаарахгүй.
Цайлган бачуурал минь
Цаг хугацаатай тэмцэлдүүлнэ.
Хөнгөн алхаа минь
Харалган болгосноос цаашгүй.
Зүүрмэглэх төдий нойр минь
Зүүд гэдэг өвчнийг…
www.URLAG.mn