Монгол Улсын Соёлын Гавъяат Зүтгэлтэн Ц.Нарангэрэл түүний шавь нарын хамтарсан уран бүтээлийн үзэсгэлэн Blue Moon арт галерейд дэлгэгдэж байна.
Уг үзэсгэлэнд МУСГЗ Ц.Нарангэрэл багш болон үе үеийн төгсөгч 30 гаруй уран бүтээлчдийн 60 орчим бүтээлийг та бүхний оюуны мэлмийд өргөн барьж байна. Монументаль уран зургийн Ц.Нарангэрэл багшийн урланд 1992 оноос анхны төгсөлт хийснээс хойш тус урлангаас нийт 11 төгсөлтөөр 108 оюутан суралцаж гарчээ. Төгсөгчдөөс өнөөдөр олон бүтээлч үзэгчдийн танил болж өөр өөрсдийн арга барил өнгө төрхийг олсон уран бүтээлчид болжээ.
Зураач хүн этюд, судалбар зургийг байнга хийх ёстой гамма хэмээн олон жил уран бүтээлчдийг урлагийн замд хөтөлсөн багш Ц.Нарангэрэл хэлэх дуртай. Тиймээс энэ удаагийн үзэсгэлэнгээ “ETUDE” хэмээн нэрлэжээ.
ЭТЮД /Etude/- Биет зүйлээс зурагдаж байгаа ирээдүйн бүтээл юм уу, эсвэл хэсгийн бэлтгэл болгож хийсэн бүтээл бөгөөд байгалийн гэрэл, агаарын орчинг шууд мэдэрч байгалийн гоо сайханыг үзэгч таньд мэдрэх боломжийг олгодог дүрслэх урлагийн нэгэн төрөл юм.
Уг үзэсгэлэн нь анх “УРЛАН-1” нэртэйгээр гарч байсан ба 2 дахь жилдээ зохион байгуулагдаж байна. Цаашид ч жил бүр уламжлал болгон гаргахаар төлөвлөж байгаа гэнэ.
СУИС-н ДУСургуулийн монументаль уран зургийн багш, урлангийн нийт төгсөгчдөд амьдрал, уран бүтээлийн өндөр амжилт хүсэн ерөөе.
Уг үзэсгэлэн 2013 оны 12-р сарын 01-13-ны хооронд “Blue moon” арт галерейн үзэсгэлэнгийн танхимд үргэлжлэх бөгөөд дэлгэрэнгүй мэдээллийг 89806021, 88773410 дугаарын утсаар лавлана уу.
www.URLAG.mn
