И.В.Гётегийн “Фауст”, Ф.М.Достоевскийн “Гэм зэм”, Жон Патрикийн “Опал”, С.Жаргалсайханы “Шөнө дундын бүжиг”, Жорж Орвеллын “1984”, Үй Хуагийн “Амьдрахуй” жүжгүүдийг үзэгчдэд хүргэснээр нь “Орфей” театрыг театрын урлагт шимтэгсэд андахгүй. Тэгвэл эл театрын захирал, ерөнхий продюсер Т.Ариунчимэгийг онцлон танилцуулъя.
Т.Ариунчимэг сурагч ахуйдаа Монголын хүүхдийн ордны драмын дугуйланд Ж.Амарзаяа багшийнхаа удирдлагад суралцаж, “Хэзээд бэлхэн” “Паян” хүүхдийн нэвтрүүлгийн хөтлөгч байв. Ахлах сургуулиа төгсөөд эхлээд биотехнологийн чиглэлээр мэргэжил эзэмшжээ. Харин энэ үедээ Төрийн шагналт Д.Сособарамын найруулан тавьсан Айн Рэндийн “Төгс” нэртэй драмын жүжигт дүр бүтээх завшаан тохиосноор тэрбээр уран бүтээлийн замналаа эхэлсэн юм. Улмаар 2016 онд СУИС-ийг Төрийн шагналт, Урлагийн гавьяат зүтгэлтэн Н.Наранбаатар болон найруулагч Ц.Батнайрамдал нарын удирдлагад хөгжимт театрын жүжигчин мэргэжлээр дүүргэжээ. Үргэлжлүүлэн урлаг судлаачаар суралцсан байна.
Т.Ариунчимэг 2017 онд Монгол, ХБНГУ-ын хамтарсан “Михайл Коолхаас” жүжиг, 2020 онд найруулагч С.Бямбаагийн “Хэвтрийн хүн” киноны гол дүрд тоглож, 2021 онд найруулагч П.Лхагвадуламын “Есөн сарын цас” богино хэмжээний кинонд зургийн дарга, хоёрдугаар найруулагчаар ажиллаж байв. Түүнчлэн “Фауст” жүжгийн гүйцэтгэх продюсер, “Гэм зэм”, “Опал”, “Шөнө дундын бүжиг”, “1984”, “Амьдрахуй” жүжгүүдийн ерөнхий продюсероор ажилласны зэрэгцээ “Гэм зэм” пост драмын жүжгийн Порфирий Петрович, “Опал” саркастик драмын жүжгийн Глория Гулокийн дүрд тоглож амжжээ.
