Монголын циркийн урлагийн өнөөгийн байдал болон цаашид хэрхэн хөгжих, сургалтын асуудлаа яаж шийдэх, орон зай, байр шаардсан үзүүлбэрүүдээ хэрхэх зэрэг тулгамдсан асуудлаа хэлэлцэхээр “Монголын циркчидийн анхдугаар чуулга уулзалт” яг одоо Улсын Филармонийн концертын танхимд болж байна.
Уг чуулга уулзалтыг Монголын циркчдийн холбоо, Соёл, спорт, аялал жуулчлалын яам, Шинэ цирк төв, Цирк эстрад нийгэмлэг, Циркийн тэнхим, Циркийн урлагийн ахмад зүтгэлтнүүдийн холбооноос хамтран зохион байгуулж байгаа юм байна.
Анхдугаар чуулганаар Монголын циркийн үүсэл, түүхэн замнал, өнөөгийн нөхцөл байдал, ирээдүйн чиг хандлагын талаар мэргэжлийн судлаачид илтгэл тавьж, хэлэлцүүлэг өрнүүлж байна. Монголын циркчид одоогоос гурван жилийн өмнө буюу Монголд циркийн урлаг үүсч хөгжсөний 70 жилийн ойгоороо уулзалдаж, салбарын асуудлаа хэлэлцэж байсан байна. Хэдэн жилийн хугацаанд завсарласан циркийн чуулганыг сэргээж, энэ жил циркт тулгамдаж байгаа асуудал, өнөөгийн нөхцөл байдалд бодит дүгнэлт өгөхөөр ийнхүү уулзалдаж байгаа аж.
Циркчдэд хамгийн их бэрхшээл учруулж байгаа асуудал нь бэлтгэлийн байр, мэргэжлийн тоног төхөөрөмж юм. Түүнчлэн Улсын цирк хувьчлагдсанаас хойш олон цирк, студи салбарлан гарсан ч мэргэжлийн ур чадвар нь илт буурч, Монголын үзэгчдэд чанартай тоглолт үзүүлж чадахг үй байгаа билээ. Өдий хүртэл энэ урлагийн талаар ямар бодлого баримталж буй нь тодорхойгүй байгаа ССАЖЯ чуулганы дараа бодитой хариу өгнө гэж найдъя.
www.URLAG.mn