Ард түмнийхээ дунд аль хэдийнэ гавьяат хэмээн хүндлэгдсэн ч төрөөс уг шагналаа тун саяхан гардаж аваад байгаа дуучин бол Н.Төмөрхуяг. Урт үс, бүрх малгай, гитар, “солгой” хэмээх тодотгол нь түүний имиж болсоор олон жилийг үдсэн.
Аль 20 гаруй жилийн өмнө дуулж амьдруулсан уянгын дуунуудад нь төр хишгээ хүртээн Н.Төмөрхуяг дуучныг МУГЖ хэмээх цолоор мялаагаад байгаа билээ. “Харанга” хамтлагийн дуучин Х.Лхагвасүрэн түүнтэй нэг өдөр Ерөнхийлөгчийн зарлигаар МУГЖ цол хүртсэн. Тэрээр Н.Төмөрхуяг дуучинд баяр хүргэхдээ “Та аль хэдийнэ гавьяат авах байсан хүн. Муу дүүтэйгээ цуг авах гээд л хүлээгээд байж дээ” хэмээн хошигносон гэнэ. Ухаантай хүний үг ийм л байдаг. Ард түмний хүндлэл хүлээсэн сайхан дуучныг аль эрт гавьяат авах байсныг үүгээрээ хэлсэн хэрэг. Ямар ч байсан Хан Хэнтийн дуучин Н.Төмөрхуяг “Харанга”-ын Лхагваатай цуг гавьяат цол авах гэж 20 жил “хүлээсэн” нь үнэн билээ.
www.URLAG.mn
