УДБЭТ-ын уран бүтээлчид ирэх хоёрдугаар сарын 7-нд Ж.Вердийн “Травиата” дуурийг толилуулна.
Дэлхийн шилдэг долоон дуурийн нэг, А.Дюмагийн “Камелийн цэцэгт хатагтай” зохиолоос сэдэвлэн бүтээсэн 170 гаруй жилийн түүхтэй энэхүү дуурьт Монголынхоо нэрийг дэлхийн сонгодог урлагийн ертөнцөд цуурайтуулж яваа дэлхийн шилдэг баритон, Монгол Улсын Ардын жүжигчин Энхбатын Амартүвшин дуулах гэж байна.
Сонирхуулахад, “Травиата” дуурь нь анх гол баатрынхаа нэрээр буюу “Виолетта” хэмээн нэрлэгддэг байсан бөгөөд 1853 онд Италийн “Ла Фенис” театрт нээлтээ хийж байв. Эл дуурийн цомнолыг Александр Дюмагийн “Камелийн цэцэгт хатагтай” зохиолоос сэдэвлэн Ф.М.Пьяве бичжээ. Ж.Верди, Ф.М.Пьяве нар А.Дюмагийн зохиолын утга, агуулгыг дагаж, орчин үедээ тохируулан хийхийг хүссэн боловч захиалагч болох “Ла Фенис” театраас дуурийн үйл явдлыг өнгөрсөн зуунаар байлгахыг хатуу шаардсан аж. Тиймээс 1880-аад оныг хүртэл уг бүтээл жинхэнэ түүхэн хугацаагаа харуулж чадаагүй байна.
Харин манай театрын тайзнаа “Травиата” дуурт 1977 онд анхлан тавигдсан бөгөөд найруулагчаар нь Урлагийн гавьяат зүтгэлтэн Ё.Цэрэндолгор, удирдаачаар Урлагийн гавьяат зүтгэлтэн Ч.Жамсранжав, ерөнхий зураачаар Ардын зураач Ч.Гунгаасүх нар ажиллаж байв. УДБЭТ-ын уран бүтээлчид 2015 онд БНСУ-ын найруулагч Ан Хо Воныг урьж, уг дуурийг шинэчлэн тавьсан бөгөөд тайз чимэглэлийг Урлагийн гавьяат зүтгэлтэн Г.Ганбаатар, хувцсыг Г.Оюун нар урлан бүтээжээ.
