Францын Ерөнхийлөгч Эммануэль Макрон, тэргүүн хатагтай Брижит Макрон нар БНСУ-д албан ёсны айлчлал хийлээ. Хоёр орны хооронд дипломат харилцаа тогтоосны 140 жилийн ойн хүрээнд болсон тус айлчлалын албан ёсны үйл ажиллагааны дараа БНСУ-ын Ерөнхийлөгч И Жэ Мён хүндэт зочдоо Чхонвадэ ордонд зоогт урьжээ.
Зоогийг алдарт тогооч Сон Чон Вон зохион байгуулсан бөгөөд тэрээр солонгос, европ хоолоор “Мишлен” од авсан цорын ганц солонгос тогооч юм. Хоолны дараа Ерөнхийлөгч И Жэ Мён зочдодоо бэлэг гардууллаа.
Ерөнхийлөгч Эммануэль Макронд Кожон хаанаас Францын ерөнхийлөгчид 1886 онд илгээж байсан түүхэн бэлгийг дүрсэлсэн гар урлалын бүтээл гардуулсан бол Тэргүүн хатагтайд BTS, “Stray Kids” хамтлаг, дуучин G-Dragon нарын гарын үсэгтэй цомог, уламжлалт солонгос аргаар хийсэн гал тогооны хэрэглэл бэлэглэсэн байна.
Мөн дэлхийн тал баригчдын тэмцээний аварга Солонгосын багийн урласан Эйфелийн цамхгийн дүрстэй талх ширээн дээр байлаа.
Арга хэмжээнд БНСУ, Францын дипломат харилцааны 140 жилийн ойн Хүндэт элч болох жүжигчин Чон Жи Хён, “Stray Kids” хамтлагийн гишүүд байлцав. К-поп хөгжимд дуртай Тэргүүн хатагтай Брижит Макрон хамтлагийн дуучин Феликсээс гарын үсэг авч, ихэд баярлажээ.
