Төв аймгийн Зуунмод хотод ССАЖЗЯ-ны захиалгаар Монголын археологи, угсаатны үндэсний музейг бүтээн байгуулж, ирэх онд ашиглалтад оруулахаар ажиллаж байна.
Тус музейг олон улсын түвшинд хүрсэн шаардлага хангасан барилга байгууламж бүхий сэргээн засварлах, судлан шинжлэх лабораторийн хамт ашиглалтад оруулснаар археологи, палеонтологи, угсаатны судалгааны орчин сайжрахын зэрэгцээ боловсрол, шинжлэх ухааны танин мэдэх олон талт нээлттэй орон зай бий болж, орон нутгийн хөгжилд бодит хувь нэмэр оруулах ач холбогдолтой гэж үзэж байгаа юм.
Монгол Улсын Ерөнхийлөгч У.Хүрэлсүх уг музейн барилгын ажлын явцтай өчигдөр очиж танилцлаа. Энэ үеэр тус музейг ашиглалтад оруулах Ажлын хэсгийг хавсран хариуцагч, “Чингис хаан” үндэсний музейн захирал С.Чулуун танилцуулахдаа, “Анх музей байгуулах шийдвэрийг Ерөнхийлөгч У.Хүрэлсүх Монгол Улсын Ерөнхий сайдаар ажиллаж байхдаа гаргасан. Тус музей олон улсын стандартад нийцсэн лаборатори, хүүхдийн музей, номын сан зэргээс бүрдэх юм. Биет болон биет бус өвийг судлах, засварлах, сурталчлах цогц төв болох бөгөөд түүхэн аялал жуулчлалыг хөгжүүлэх боломжтой” гэдгийг тодотгож байв.
Музейн барилгын гүйцэтгэл, инженерийн шугам сүлжээ, дотор болон гадна заслын ажлын явц, цаашид хэрэгжүүлэх ажлын талаар ССАЖЗ-ын сайд Ж.Алдаржавхлан, УИХ-ын гишүүн Ж.Батжаргал, “Барилгын хөгжлийн төв” ТӨҮГ-ын захирал Д.Мөнхбаатар болон бусад албаныхан оролцож, барилгын ажлын явц, тулгамдсан асуудлыг шийдвэрлэх талаар санал солилцжээ.
Энэхүү музей, лабораторийг ирэх оны эхний хагас жилд ашиглалтад өгөх төлөвлөгөөтэй ажиллаж байгаа бөгөөд одоогоор 80 гаруй хувийн гүйцэтгэлтэй байгааг “Чингис хаан” үндэсний музей мэдээлэв.
