Дорноговь аймгийн Айраг суманд 320 хүний суудалтай Соёлын төв барих барилгын шав тавих ёслол дөрөв хоногийн өмнө боллоо.
Энэхүү барилгыг “Би рич трэйд” ХХК гүйцэтгэх бөгөөд улсын төсвийн 4,7 тэрбум төгрөгийн хөрөнгө оруулалтаар 2026-2027 онд барьж ашиглалтад оруулах юм. Хуучин соёлын төв нь 1954 онд ашиглалтад орсоноос хойш 72 жилийн хугацаанд ашиглаж эдүгээ зай талбай, барилгын чанарын хувьд ашиглалтын шаардлага хангахгүй болсон байна.
Соёлын төв ашиглалтад орсноор Айраг сумын иргэд соёлын үйлчилгээг стандартын шаардлага хангасан, тав тухтай орчинд хүлээн авах боломжтой юм. Айраг сум нь Улаанбаатар хотоос 330 км-т оршдог, 3000 гаруй хүн амтай. Төмөр зам, хатуу хучилттай авто замтай бөгөөд манай улсын жоншны ордын ихэнх хувь нь тус сумын нутагт байдаг.
