Монгол Улсад суугаа Европын холбооны төлөөлөгчийн газар болон “Урлагийн давлагаа” НҮТББ хамтран “Европын кино наадам 2026”-г энэ сарын 23–27-ны өдрүүдэд зохион байгуулна.
Таван өдрийн турш үргэлжлэх энэхүү наадмын хүрээнд Европын 13 улсын 13 шилдэг киног олон нийтэд өргөн дэлгэцээр үнэ төлбөргүй толилуулах юм. Наадмын үеэр үзэгчид Европын кино урлагийн өнгө төрхийг мэдрэхийн зэрэгцээ, дэлхий дахинаа тулгарч буй олон асуудлуудыг хөндсөн дуу хоолой, гүн гүнзгий илэрхийлэлтэй кино урлагаар дамжин танилцах боломж бүрдээд буй. Үүнд гэр бүлийн харилцаа, өсвөр нас, хөгжлийн бэрхшээлтэй иргэн, байгаль хамгаалал, сошиал хэрэглээ, өөрийгөө олж нээх зэрэг өнөөгийн нийгмийг тольдсон олон сэдэвт бүтээлүүд багтсаныг онцлууштай.
Нээлтийн үзвэрээр 2025 оны Хессений кино урлагийн “Шилдэг дэлгэцийн бүтээл” шагналт ХБНГУ-ын найруулагч Миа Маариэль Майерийн “Сэлэлтийн урт” бүтээл толилуулагдана.
“Европын кино наадам 2026” нь үзэгчдэд Австри, Болгар, Герман, Грек, Дани, Итали, Словени, Нидерланд, Польш, Финланд, Швейцар, Швед зэрэг улсуудын сор болсон, олон жанрын кино бүтээлүүдийг албан ёсны эрхтэйгээр хүргэж байгаа билээ. Мөн наадмын хүрээнд “Cinema Night” зэрэг улс орны соёлыг таниулсан хөтөлбөр болон кино урлагийн салбарын олон улсын мэргэжилтнүүд монголын уран бүтээлчдийн мэдлэг, ур чадварыг дэмжих зорилготой эрчимжүүлсэн сургалтын хөтөлбөрүүдийг хэрэгжүүлэх аж.
-660x0.png)
Наадмын онцлох хөтөлбөрүүдийн нэг болох жүжигчний ур чадварыг ахиулах сургалт нь дэлгэцийн дүр бүтээлтэд чиглэсэн 40 цагийн эрчимжүүлсэн сургалт байх бөгөөд олон улсын нэр хүндтэй кино найруулагч, багш Жессика Вүүдворт жүжигчний удирдан явуулна. Америк-Бельгийн кино найруулагч, зохиолч, продюсер тэрээр Монголд зураг авалтаа хийсэн “Khadag” киногоороо 2006 оны Венецийн кино наадмаас “Golden Lion of the Future” шагналыг хүртэж байсан амжилттай олон улсын ментор юм.
Мөн анхны бөгөөд хоёрдох киногоо бүтээх гэж буй кино уран бүтээлчдэд зориулсан “EURO CINELAB 2026” богино хэмжээний кино бүтээх лаборатори сургалт өнгөрөгч 5 сард амжилттай зохион байгуулагдсан. Уг хөтөлбөрт хамрагдсан нийт 12 оролцогчид “Өөрийн хөрөг” сэдвийн хүрээнд 3-10 минутын богино хэмжээний кино бүтээх бөгөөд энэ сарын 27-н буюу наадмын сүүлийн өдөр олон нийтэд бүтээлээ толилуулж, зохион байгуулагчдын зүгээс шилдэг гурван киног шалгаруулна.
