Дуучин С.Сэрчмаа дууны хэрүүл хийгээд сүүлийн үед тун ч бухимдаж яваа. Магадгүй өнгөрсөн хугацаанд түүний хийсэн бүтээлүүдээс хамгийн ихээр сонсогчдод хүрсэн дуу бол яах аргагүй “Шинэ жил ирлээ”. Гэтэл энэ дууг “Нэгэн зүгт” хамтлагийн дуучин С.Заяа, дуучин Ч.Цэлмүүн нар шинэчилж, дуулсан нь хэрүүлийн алим шидэлцэхэд хүргэсэн юм.
С.Сэрчмаа өөрийнх нь дууг хулгайллаа хэмээн зарга хийж эхэлсэн. Харин С.Заяа хөгжмийн зохиолч Н.Санжаагаас өөрөөс нь албан ёсоор зөвшөөрөл авч дуулсан гэж байгаа.
С.Сэрчмаа хөгжмийн зохиолч Н.Санжаа дээр очоод энэ талаар тодорхой тайлбар хийж буй бичлэгийг цахим ертөнцөд байршуулах үед дуучин Ч.Цэлмүүний нөхөр түүнд хандаж “Эхнэрийн минь нэрийг энэ хэрүүлээсээ салгаж өгөөч. Анхнаасаа эхнэр маань зөндөө асуусан, тэр залуу ч зөвшөөрөл авсан гэж ярьсан. Хов живнээс хол баймаар байна. Та ч энэ зовлонг сайн мэдэх хүний хувьд, гэр бүлийг минь хүндэтгээч” гэсэн мессеж явуулсан болохыг олон нийтэд дэлгэсэн.
Харин дуучин С.Заяа үүнд нь ихэд эгдүүцэж “Н.Санжаа хөгжмийн зохиолчийн дуулахыг зөвшөөрснийг гэрчлэх хоёр хүн, нотлох баримт, ярьсан яриа бүгд байгаа. Энэ бүхнийг би энд биш, шийддэг газар нь өгч шийдүүлэх болно” хэмээн сонсогч фэнүүддээ албан ёсоор мэдэгджээ.
Дуугаа булаацалдсан дуучдын хэрүүл улам гаарч, шүүхийн хаалга татах дээрээ тулах нь бололтой.
Эх сурвалж: Mass.mn
