“Хурд” хамтлаг сонсогч фенүүддээ зориулан шинэ уран бүтээлүүдээ цувралаар танилцуулсаар байгаа билээ. сүүлийн жилүүдэд "Хурд" хамтлагийн урын санд 20 орчим шинэ дуу мэндэлсэнээс эхний ээлжинд 8-н дууг сонгон авч “ETV” телевизийн хамт олонтой хамтран "Нарлаг диваажин" хэмээх шинэ уран бүтээлүүдээ танилцуулах төслийг сар гаруй хугацаанд хэрэгжүүлэхээр болоод 7 хоног бүр нэгэн шинэ уран бүтээлээ цацаж байгаа юм.
"Нарлаг диваажин" төслийн хүрээнд "Нарлаг диваажин", "Яамайдаа", "Хүн чулуу","Гэгээн гуниг", “Байгаа л юм чинь”, "Хатан эрдэнэ" зэрэг сайхан уран бүтээлүүд та бүхэндээ хүргэсэн. Тэгвэл 20 жилийн турш тасралтгүй уран бүтээлээ түмэн олондоо хүргэсэн алтан хамтлагийн зүгээс уг төслийн тав дахь уран бүтээл болох "Инээмсэглэ бүсгүйчүүд" нэртэй шинэ уран бүтээлээ сонсогч түмэндээ хүргэхэд бэлэн болжээ. Ингээд та бүхэндээ "Нарлаг диваажин" төслийн ээлжит уран бүтээлийг толилуулж байна.
Энэ дашрамд дуулгахад "Нарлаг диваажин" төслийн ээлжит дуу болох "Инээмсэглэ бүсгүйчүүд" хэмээх дуугаа Хурдын фен бүсгүйчүүддээ зориулж байна. Түүнчлэн тус уран бүтээлийг 1 жилийн өмнө БНСУ ын Сөүл хотод болсон "20 жилийн ойн" тоглолт дээр анх дуулагдсан. Мөн 2014 оны зун "IRISH" асарт дуулагдсан, мөн өнгөрөгч 11 сард "IRISH", "ЭРГЭН ДУРСАХУЙ" клубт дуулагдсан. Харин одоо та хүссэн үедээ сонсох боломжтой боллоо.
