Заан дөрвөн соёогоо яралзуулан
Заамал зургаан хүзүүгээ гүвдэлзүүлээд
Дунгийн угалзан хамраа сортолзуулаад
Дуран хар нүдээ тормолзуулаад
Могой нарийн хэлээ шоволзуулаад
Молор цагаан шүдээ яралзуулаад
Хавцал болсон амаа ангалзуулаад
Харгай болсон чихээ сэртэлзүүлээд
Суман сайхан дэлээ савсалзуулаад
Буман сайхан сүүлээ цацруулаад
Түмэн агтын түрүүнд
Түгдрэлгүй гүйгээд ирдэг
Мянган агтын түрүүнд
Мятралгүй гүйгээд ирдэг
Ширэтэй газар гэж
Шигдэлгүй гүйгээд ирдэг
Салаатай модын дээгүүр
Сартай тэнгэрийн доогуур
Сая сая агтын түрүүнд
Салхи мэт шуугиад ирдэг
Үзүүртэй модны дээгүүр
Үүлтэй тэнгэрийн доогуур
Үй түмэн агтын түрүүнд
Үнэн хурдаар гүйгээд ирдэг
Харцага шонхор шувуу шиг
Халин дэвээд ирдэг
Харвасан нумын сум шиг
Харайн дэгдээд ирдэг
Хөдөө талыг хөвчлөн гүйгээд ирдэг
Зуун агтын хурдаар
Зуузай хийгээд ирдэг
Наян хурдан агтаар
Наадам хийгээд ирдэг
Мянган сайн эрийн
Магнайг баярлуулаад ирдэг
Торгон жолоог сунгаад ирдэг
Тостой цулбуур бариулаад ирдэг
Адуун сүргийн манлай болсон
Аавын хүүгийн унаа болсон
Эзэн хүнээ баярлуулсан
Энгийн хүний сонирхсон
Эрдэмтэй сайн хүлэг мөнөөсөө мөн.
