“Дурлал юуг хүснэ вэ” дуугаараа олны танил болж, бие даасан тоглолтоо хүртэл хийгээд авсан дуучин Daisy гэх бүсгүй бий. Илэн далангүй яриатай, уран бүтээлээ өөрийнхөө зав чөлөөнд тааруулж хийдэг гэж ярих түүний нөхөр нь хөгжмийн зохиолч, продюссер Ганг. Өдгөө “Prosounds” студид уран бүтээлээ туурвиж буй авьяаслаг залуу “Эхнэр маань дуучин, би өөрөө ая зохиодог. Гурван хүүхэд маань ч гэсэн урлагийн авьяастай болох нь мэдэгдэж байгаа.
Гэхдээ би тэднийг урлагт уруу татахгүй ээ. Зүгээр л өөр мэргэжлээр суралцах боломж олгоно. Мэдээж, хажуугаар нь хүүхдүүддээ төгөлдөр хуур, гитар тоглохоос гадна дуулах ур чадварыг зааж сургана. Эхнэртэйгээ хамт уран бүтээл хийгээч гэсэн санал их л ирдэг юм. Нэг гэр бүлийн улс хамтарч ажиллах зарим үед хэцүү шүү дээ. Ямар сайндаа л, уран бүтээлийн үед чи бид хоёр эхнэр нөхөр хоёр биш шүү.
Маргаж муудалцах хэрэг гарвал хэн хэндээ буулт хийж маяглахгүй гэж бие биедээ хэлдэг юм” хэмээн ярьсан. Харин түүний эхнэр нь цөөн боловч чанартай уран бүтээл гаргахыг эрмэлздэг гэсэн. “Зөрлөг” уран сайхны киноны дуу болох “Дурлал юуг хүснэ вэ” дуугаа зохиосны дараа киноны гол дүрд тоглосон дуучин Нарад өгсөн аж. Гэтэл цаадах нь олигтой дуулж чадахгүй байсан тул сэтгэл гонсгор явсан Daisy өөрөө дуулж, олонд хүргэсэн гэдэг юм билээ.
Р.Есүй
