Монголын үзэгчдийг удаан хүлээлгэсэн олон улсын циркчдийн тоглолт өчигдөр нээлтээ хийсэн. "Дэлхийн Цирк Монголд” хэмээх нэртэйгээр зохион байгуулагдаж буй уг тоглолтод тив дэлхийд алдартай циркийн шилдэгүүд олон жилийн дараа ийнүү Монголд чуулж байгаа ажээ. Тоглолт ердөө долоохон хоног тоглогдох бөгөөд АНУ, ОХУ, Герман, Украйн, Унгар, Канад, Вьетнам, Гватемал, Азербайжан, БНХАУ, Испани, Армен, Монгол зэрэг нийт 15 орны 60 гаруй жүжигчид оролцох юм. Олон улсын томоохон тэмцээнүүдийн алт, мөнгө, хүрэл цомын эзэд маань өөрсдийн шилдэгийн шилдэг үзүүлбэрүүдтэйгээ манай оронд зочилж байгаа юм.
Түүнчлэн бяцхан үзэгчидийгээ баярлуулахаар хөгжилтэй алиалагчид болон олон улсын нэр хүндтэй тэмцээнүүдийн шагналтан авьяаслаг муужгайнууд, акробатчин нохой зэрэг өхөөрдөм жүжигчид бас ирсэн байгаа гэнэ. Тус тоглолтыг ССАЖЯ-ны дэмжлэгтэйгээр “Монгол Циркийн Хөгжлийн Төв” ТББ зохион байгуулж байгаа бөгөөд урлаг соёлын болоод бизнесийн олон арван байгууллага энэхүү тоглолтыг дэмжиж хамтран ажиллаж байгаа билээ. Мөн тоглолтын зохион байгуулагчдын зүгээс бэлтгэл ажил бүрэн хангагдсаныг зарласан юм.
Ийнхүү монголын циркийн алтан тайзнаа дэлхийн шилдэгүүд дахин цуглаж үзэгч түмэн, хүүхэд багачуудад Дэлхийн циркийн урлагийн өнөөгийн түвшинг бодитоор нь үзүүлж монголын циркийн урлагийн нэрийг дэлхий дахинаа цуурайтуулахад энэхүү тоглолтын зорилго оршиж байгаа ажээ.
Тоглолтын тасалбар: Хүүхэд 10.000, том хүн 15.000 төгрөгийн үнэтэй юм байна.
Та бүхнийг урлагийн тэнгэр ивээг…
www.URLAG.mn
