Монголын дүрслэх урлаг шинэ залуу уран бүтээлчдийн бүтээлээр өдрөөс өдөрт өргөжин тэлж, байгаа юм. Үүний нэг тод илрэл бол өнгөрсөн амралтын өдөр “Цагаандариум” арт галерейд ХБНГУ-ын Веслинг хотын урлагийн холбооны шагналт зураач Цэндийн Ган-Эрдэнэ, ХБНГУ-ын Д.Конвиарцын нэрэмжит шагналт Зураач Цэгмэдийн Цаца нарын хамтарсан уран бүтээлийн шинэ үзэсгэлэн нээлтээ хийлээ.
"Вack to the roots" буюу “Эргээд эх үндэс рүүгээ” хэмээх энэхүү үзэсгэлэнд хоёр уран бүтээлч маань сүүлийн нэг жилийн турш бэлтгэсэн бүтээлээрээ дамжуулан монголчууддаа Герман улсад юу сурч мэдсэнээ тайлагнан үзүүүллээ. Уг үзэсгэлэн нь тэдний эх орондоо дэлгэж буй анхны үзэсгэлэн гэдгээрээ онцлог юм.
Үзэсгэлэнгийн эздийн тухай нэгэн сонирхолтой түүхийг өгүүлэхэд, тэд хоёулаа 1979 оны нэг сар, нэг өдөр төрсөн, арван жилдээ нэг ангид суралцаж байсан, Дүрслэх урлагийн дээд сургуульд суралцан дараа нь ХБНГУ-ыг зорин өнөөдрийг хүртэл тэнд уран бүтээлээ туурвин ажиллаж, амьдардаг гээд маш сонирхолтой сэжмээр холбогдсон уран бүтээлчид аж. Харин тэдний уран зургийн үзэл бодол, философи, арга техник эрс тэс өөр бөгөөд тэрхүү өөр өөрсдийн урлагийн ертөнцийг энэ л танхимд дэлгэн харуулсан юм. Зураач Ц.Цацагийн хувьд уран бүтээлийн сэдэв нь бэлэгдэл, нууцлаг байдал руу нэлээд нэвтэрч, түүнийг тайлахыг хичээсэн өвөрмөц зургуудыг дэлгэн харуулсан бол зураач Ц.Ган-Эрдэнийн хувьд байгальтай холбоо, уялдаатай болон хүний дотоод ертөнцийг нээн харуулсан бүтээлүүд нь үзэгчдийн хүртээл боллоо.
www.URLAG.mn
