Цоодолын Хулангийн ‘’ Зүгээр л нэг суугаад зүлгэн дээрээ гэрээ бариад суухсан ‘’ гэсэн шүлгийн мөрүүдийг стресст автсан хүн бүр хэлэх болжээ. Уншигч, үзэгчид яруу найрагч Ц.Хулан хэмээх гандан буурахгүй, жавхаалаг бүсгүйн сэтгэлд шингэсэн шүлгүүдээс нь гадна UBS телевизийн ‘’To be or not to be’’ буюу ‘’Орших уу, эс орших уу ‘’ нэвтрүүлгийн шүүгчээр нь түүний цар хүрээтэй сэтгэлгээг илүү таниж мэдэх болсон. Ц.Хуланг дээдсийн хүрээллийн хүүхнүүдийг илтгэх хурц улаан өнгө, дэгжин малгайгүйгээр төсөөлөх аргагүй. Өнөө цагийн яруу найргийн өнгө төрхийг тодорхойлолцож яваа яваа галтай цогтой яруу найрагчдын нэг гэдгийг хэн ч хүлээн зөвшөөрдөг. Түүний яриа ялдам төдийгүй үнэн байдаг. Эх орноо гэсэн сэтгэл шүлгэнд нь ч, зүрх сэтгэлд нь ч шингээстэй байдаг. Шулуун шударга үг яриатай хэнтэй л бол хэнтэй зохицон хамтран ажиллаж чаддаг төдийгүй ямар ч байсан С.Баяраас эхлээд Ц.Элбэгдорж Ерөнхийлөгчөөс хүртэл дэмжлэг туслалцааг авч чаддаг, тэднийг бас дэмжиж, хэрэгтэй цагт нь дуу хоолойгоо хүргэж чаддаг бүсгүй. Тэр цаг үргэлж хэвлэлийн нүүрийг чимж, анхаарлын төвд байж чаддаг болохоор хар цагаан хэл ам дагаастай л явдаг. Элдэв хэл амнаас жийрхэхгүй эрэмгий, омголон эмэгтэй. Нэгэн цагт дөч гарсан эрд дурласан тухайгаа шүлэг бичин, олныг шуугиулж явсан удаатай. Үүнийгээ тэрбээр тайлбарлахдаа,’’ Нэг нь хэдэн жилийн өмнө ирж, нөгөө нь арай хэдэн жилийн дараа ирдгээрээ л ялгаатай болохоос биш адилхан төрөөд үхдэг хүмүүст насны ялгаа гээд байх хэрэг юун’’ гэсэн байдаг. УИХ-ын сонгуульд өрсөлдөх яриа хэдэнтээ гарч байсан ч тэрээр дэвшээгүй. ‘’Улс төрд орж доошоо орохгүй’’ гэж бардам хэлэх дуртай. Утга уран зохиол, яруу найргийг юунаас ч дээгүүр тавьдаг ясны найрагч хүн бөгөөд бусад эмэгтэйчүүдийг өөр шигээ байгаасай гэж хүсдэг гэнэлээ.
Эх сурвалж: aravt.mn
