"48 цаг кино наадам"дѳрѳв дэх удаагаа болох гэж байна. Монгол Улсын өнцөг булан бүрээс уран бүтээлч, сонирхогчид хүрэлцэн ирж 48-xан цагийн дотор xамгийн сайн богино xэмжээний кино xийxийн төлөө ур ухаанаа шавхан өрсөлддөг билээ. Уг наадмыг зохион байгуулагч Н.Цогтбаяраас зарим зүйлийг тодруулсан юм.
-Энэ жил хэдэн кино өрсөлдөх бол?
-Одоо бүртгэл явагдаж байна. Аравдугаар сарын 10-нд бүртгэл дуусаад хэдэн баг оролцох нь тодорхой болно. Одоогийн байдлаар 26 баг бүртгүүлээд байна. Оролцуулах багийн тоо хязгаартай учраас уран бүтээлчид маань амжиж бүртгүүлэх хэрэгтэй. Энэ нь театрын үзлэгийн цагаас хамаарч байгаа юм.
-Шилдэг бүтээлээ хэрхэн шалгаруулах вэ?
-Аравдугаар сарын 19-ний бямба гаригт шилдгээ шалгаруулах төлөвлөгөөтэй байна. Наадам зохион байгуулагчдын зүгээс тодорхой шалгуур тавьдаг. 48 цагийн өмнө багуудаар сэдэв сугалуулаад, тухайн сэдвээрээ хоёр хоногийн дотор 4-7 минутын кино хийх ёстой. Жил ирэх бүр оролцох багийн тоо нэмэгдэж байгаа. Энэ кино наадам зохион байгуулагдаж эхэлсэн цагаас хойш 76 богино хэмжээний бүтээл төрсөн.
-Түрүүлсэн баг олон улсын “48 цаг” кино наадамд оролцох эрх авдаг. Өнгөрсөн жилүүдэд түрүүлсэн кинонууд ямар амжилттай оролцсон бэ?
-Тэргүүн байр эзэлсэн бүтээл нь "2013 оны 48 цагийн шилдэг кино" шагналын төлөө дэлxийн өөр бусад xот, улсаас шалгарсан кинонуудтай өрсөлдөх юм. 2010, 2012 онд түрүүлсэн кино тухайн онуудынхаа олон улсын “48 цаг” кино наадамд шилдэгт шалгарч байсан. Энэ наадмын шилдгүүдийг багтаасан DVD гаргадаг. Үүнд манай хоёр кино багтсан. Мөн Францын олон улсын кино наадамд оролцох урилга авч оролцсон. Цаашдаа ч олон улсын наадамд илүү амжилттай оролцох бүрэн боломж бий.
-Шүүгчээр ямар хүмүүс ажиллах вэ?
-Шүүгч нарыг шилдэг кино шалгаруулах өдөр хүртэл нууцалдаг. Тиймээс 19-нд бүх зүйл тодорхой болно гэсэн үг.
Эх сурвалж: "ӨДРИЙН ШУУДАН" сонин
