Та бидний сайн мэдэх “Юнайтэд Колорс ов Бэнеттон” брэндээс Кубийн уран бүтээлч Эрик Равиэлотой хамтран нэгэн сонирхолтой төсөл дээр ажилласан нь “Лана Сутра” хэмээх дараах бүтээл юм. “Лана” нь Итали болон Францаар ноос, ноосон утас гэсэн утгатай бол “Сутра” нь нэгдэн нийлэх, уусан шингэх гэсэн утгыг гаргаж байгаа юм байна.
Энэ нь тус брэндийн шинээр гаргаж байгаа коллекцид зориулсан өвөрмөц шийдэлтэй бүтээлүүд бөгөөд брэндийн голлох өнгөний шийдлүүдээс санаа авч ноосон утсаар амилсан “сексийн байрлал” бүхий үзмэрүүд юм.
Энэхүү бүтээлүүд Истанбул, Милан, Мьюнич зэрэг хотуудад нээгдсэн “Юнайтэд Колорс ов Бэнеттон”-ы салбаруудын нээлтийн арга хэмжээнд зориулагдан тавигдсан байна.
Уран бүтээлч Эрик нэгэн ярилцлагадаа: “Хамгийн сүүлд ажилласан энэхүү бүтээлээрээ би өнгөний гайхамшигт олон талт хослолоор ямар ч шашин шүтлэг, соёл, арьс өнгө, өссөн төрсөн газар нутаг гэх мэтээр хүн төрөлхтнийг ялгаварлан гадуурхалгүй бүгдийг нь нэгэн чигт хөтөлдөг хайр гэдэг зүйлийг, бие биесдээ нэгдэн уусан шингэж буй агуу хайрыг илэрхийлэхийг хүссэн юм. Би Кубад төрсөн ч үүний өмнө би Дэлхий гэдэг гараг дээр төрсөн хүн. Би бол хүн, тэр дундаа ямар нэгэн хил хязгаарт баригддаггүй, итгэдэг ч үгүй хүн. Энэ бол миний дэлхий, бас бидний. Бүгд энэхүү хил хязгаарыг сөрөн хайр гэдэг цор ганц зүйлд нэгдэн шингэдэг шүү дээ.” гэжээ.
Эх сурвалж: PlaySkull.mn
