“Сүнжидмаа” дуулалт жүжгийг театрын тайзнаа дахин тоглох болсонтой холбоотойгоор Төрийн соёрхолт, Хөдөлмөрийн баатар, Ардын жүжигчин Д.Лувсаншарав, Урлагийн гавьяат зүтгэлтэн Ё.Цэрэндолгор нар өнөөдөр 13:00 цагаас ДБЭТ-т мэдээлэл хийлээ.
“Сүнжидмаа” дуулалт жүжгийг анх 1981 онд Соёлын гавьяат зүтгэлтэн Ж.Бадраа бичиж, Төрийн шагналт, Хөдөлмөрийн баатар, Ардын жүжигчин Д.Лувсаншарав хөгжмийг нь зохиож байжээ.
“Сүнжидмаа” дуулалт жүжиг 32 жилийн дараа Дуурь, бүжгийн эрдмийн театрын тайзнаа эргэн ирж байна. Аравдугаар сарын 4, 5, 6-ны өдрүүдэд ДБЭТ-т 19:00 цагаас тоглогдох эл жүжгийг Ё.Цэрэндолгор найруулагч шинэчилсэн найруулгаар тавих ажээ. Тоглолтын тасалбарын хувьд суудлынхаа зэрэглэлээс шалтгаалан 15, 20, 25 мянган төгрөгийн үнэтэй ажээ.
“Сүнжидмаа дуут хөгжим, бүжгийн цоморлиг” нэртэйгээр хамгийн анх тайзны бүтээл болж байсан уг жүжгийн ерөнхий найруулагчаар Ё.Цэрэндолгор, ерөнхий удирдаачаар Гавьяат жүжигчин С.Сүндэд ажиллаж, Б.Сарантуяа, Гавьяат жүжигчин А.Нэргүй, Ардын жүжигчин Н.Норовбанзад нарын алтан үеийн уран бүтээлчид тоглож байжээ.
www.URLAG.mn
