Төрийн соёрхолт зураач Б.Пүрэвсүхын урланд 1979 онд сурч Дүрслэх урлагийн дээд сургуулийн уран зургийн ангийг төгссөн долоон уран зураачын онцлог өнгө аясын харуулсан “Нар сарны дор” уран бүтээлийн үзэсгэлэн энэ сарын 4-нд 17.00 цагт Урчуудын эвлэлийн хорооны үзэсгэлэнгийн танхимд нээлтээ хийх гэж байна.
Уг үзэсгэлэн нь хоёрдох жилдээ зохиогдож байгаа бөгөөд МУЭ-ийн шагналт зураач Ч.Хүрэлбаатар, Г.Лхагвасүрэн болон зураач Б.Очирхуяг, С.Ганболд, Д.Эрдэнэбилэг, Б.Чулуунбат, Д.Пүрэв нарын уран бүтээл дэлгэгдэх нь ээ.
Эдгээр уран бүтээлчид нь Репин, Суриковын академи, УБДС, СУИС-ийг төгссөн бөгөөд 1980-аад оноос идэвхитэй уран бүтээлээ тууривсаар өнөөдрийн үзэгчдэд үнэлэгдэж, танигдсан зураачид юм. Мөн бие даасан уран бүтээлийн үзэсгэлэнгээ гадаад, дотооддоо гаргасан төдийгүй, уран бүтээлүүд нь Америк, Англи, Франци, Бельги, Итали, Герман, Швецарь, Солонгос, Япон, Хятад, Тайван, Малайз, Сингапур зэрэг олон орны уран зураг цуглуулагчдын сан хөмрөгт хадгалагдсаар байна.
Уран бүтээлчдийн онцлог нь 1979 оноос хойш мэргэжлээрээ тасралтгүй уран бүтээлээ тууривсаар ирсэн бөгөөд реализмаас модернизмийн өнгө аясыг илэрхийлсэн уран бүтээлүүд тавигдаж байгаа юм. Үзэсгэлэн энэ сарын 10-ныг хүртэл үнэ төлбөргүй олны хүртээл болно.
www.URLAG.mn
