Зул сарын баярын тухай дэлхийн “хит” кинонуудын нэг “Чамайг унтаж байх хойгуур” кинонд аавыгаа алдаж цор ганцаараа үлдсэн, аавынхаа нэлмэгэр хар пальтог байнга өмсч явдаг бүсгүй (Уг бүсгүйн дүрд Оскарын шагналт жүжигчин Сандра Буллок тоглодог) гадаад паспорт авчихсан түүндээ ганц ч штамп даруулаагүй ч гадаадаар аялж паспортоо штамп даруулж дүүргэх мөрөөдлөө найз залуудаа ярьдаг. Манайхан ч яг тийм. Шив шинэхэн паспорт авчихаад Америк, Япон, Европын орнууд руу явах, үгүйдээ Солонгост очиж ажиллах хүсэлтэй ч виз гарнаа гэж үгүй. Америк, Канад, Герман, Япон, Солонгос зэрэг элчин сайдын яамны үүдэнд оочерлон, яс горьдсон нохой шиг виз гарахыг хүлээдэг ч ихэвчлэн “no” гэсэн хариулт авч, азгүй зарим 10 жил виз мэдүүлэх эрхгүй хар тамга даруулдаг. Гэвч монголчуудад бүгдэд нь хатуурхаад байдаггүй, тэр тусмаа авъяас билэгтэй хүнд дэлхийн улсуудаар зорчих аялах виз амархан олддог бололтой.'
Монгол зураач Самбуугийн Заяасайхан ДУДС, СУИС-ийн Монгол зургийн ангийг дүүргэснээсээ хойш Америк, Японд амьдарч, дэлхийн улсуудаар аялан яваад паспортны хугацаа ч дуусаагүй ч, явсан улсынхаа хил дээр орж гарсан штамп даруулсаар байгаад паспортных нь хуудас дүүрчихдэг гэдэг. Дэлхийн улсуудаар аялж, уран бүтээлийн эрэл хайгуул хийж явдаг нь зураач С.Заяасайханд мэдээж үр дүнгээ өгч байгаа биз. Юутай ч google-ээс Заяасайхан гээд хайхад л англиар ч, орос хэлээр ч Монголын зураач Заяасайхан гээд зөндөө мэдээлэ, уран бүтээл нь гараад ирэх юм билээ. Зураач Самбуугийн Заяасайхан Монгол зураачдаас хамгийн олон удаа гадаадад үзэсгэлэнгээ гаргасан зураач гэж тооцогдоно. Америкийн томоохон хот Нью Иоркт 2011 үзэсгэлэнгээ гаргасан. Мөн 2007, 2010 онуудад Америкт үзэсгэлэнгээ гаргаж байжээ. Японд 10 шахам удаа үзэсгэлэнгээ гаргасан. Германд бүр 2001 онд үзэсгэлэнгээ гаргаж, 2010 онд Англи болон Европын орнуудад, 2008 онд Австралид зургийн үзэсгэлэнгээ гаргаж байж. Харин Монголдоо 1999, 2003 онд үзэсгэлэнгээ гаргаж байжээ. Харин яг одоо Франц улсад үзэсгэлэнгээ гаргаж байгаа юм байна. Гэвч дэлхийгээр нэг тойрчихсон дэлхийн тэргүүлэх улсуудын томоохон галерейд үзэсгэлэнгээ гаргаж, Монголыг сурталчилж, өөрийнхөө уран бүтээлийг дэлгэн үзүүлж, Монгол зургийн гайхамшиг, Монгол зураачийн ур чадвар, авъяас билгийг гайхуулж яваа С.Заяасайхан зураачийг монголчууд төдийлөн мэддэггүй. Ингээд амралтын өдөр www.tovchoo.mn сайт уншигчиддаа зориулан зураач Самбуугийн Заяасайханы уран бүтээлээс дэлгэн үзүүлж байна. Хэрэв та зураач С.Заяасайханы уран бүтээлийг үзэж сонирхъё гэвэл https://www.facebook.com/Zayasaikhan хаягаар орж үзээрэй.
Эх сурвалж: tovchoo.mn
