Инээсэн маск, шүүгчдийн хатуу атлаа үнэн үг, оролцогчдын догдлол, мөрөөдлөө биелүүлэх гэсэн авьяастнуудгүйгээр “To be or not to be” буюу “Орших уу , Эс орших уу” театрчилсан шоу нэвтрүүлгийг төсөөлөхийн аргагүй. Энэ жилийн нэвтрүүлэг үзэгчиддээ хүрч эхлээд нэлээдгүй хугацааг өнгөрүүлээд байна. 10 дугаар сарын 16, 17-ны өдрүүдэд “To be or not to be” театрчилсан шоуны хоёрдугаар шатны шалгаруулалт Цүки хаус төвд болж өнгөрлөө.
Нэгдүгээр шатны шалгаруулалтанд тэнцэж, дараагийн шатандаа орох эрхийн эзэн болсон оролцогчид маань энэ удаа бэлтгэлээ тун чамбай хангаж ирсэн нь ажиглагдаж байлаа. Шат өгсөх бүр шүүлт нарийн болж, 400 гаруй авьяастанаас ялгарч тодорч чадсан зөвхөн ганц оролцогч л гранпри шагналын эзэн болох учиртай. Тиймээс өрсөлдөөн маш ширүүн явагдаж, гуравдугаар шатанд орох эрхийг 40 гаруйхан оролцогч авч чадсан.
Энэхүү шалгаруулалтын дараа гуравдугаар шатанд оролцох эрхийг гардсан оролцогчдод дараагийн шатны даалгаврыг өгсөн юм. Шоуг санаачлан зохион байгуулагч UBS телевизийн удирдлагууд болон тус шоуны шүүгч, УДЭТ-ын Ерөнхий найруулагч МУСТА Н.Наранбаатар, СУИС-ын багш Батнайрамдал нар гуравдугаар шатны даалгавар болох монологийг хэрхэн сонгох, яаж бэлтгэх хэрэгтэй, чухам юуг онцлон анхаарвал зохистой зэргийг сануулж хэлсэн. Оролцогчид ч энэ үеэр сонирхосон асуултандаа хариулт авч чадсан юм. “To be or not to be” театрчилсан шоуны гуравдугаар шатны шалгаруулалт 2013 оны 11-р сарын 13,14-нд болно.
www.URLAG.mn
