Гүнж Дианагийн алдарт “өшөө авалтын” гэгддэг даашинзыг дуудлага худалдаагаар худалдахаар болжээ. Грекийн загвар зохион бүтээгч Христина Стамболианы бүтээсэн энэхүү хар өнгийн даашинзыг энэ сард Лондонд үзэсгэлэнд тавих юм. Дараа нь тус даашинзыг Хонконг, Женевт үзэсгэлэнд тавьж, Нью-Йорк хотод арванхоёрдугаар сарын 9-нд дуудлага худалдаанд оруулах болсон байна. Тус даашинз 300 мянган ам.доллар хүрнэ гэж шинжээчид үзэж байгаа юм.
Диана уг даашинзыг 1994 оны зургаадугаар сарын 29-нд өмссөн. Тухайн өдөр цацагдсан “ITN” телевизийн баримтат кинонд Дианагийн нөхөр хунтайж Чарльз гэр бүлээс гадуурх харилцаа үүсгэснээ хүлээн зөвшөөрсөн юм. Энэ тухай мэдээллийг Их Британийн хэвлэлүүд хэдхэн хоногийн өмнө задруулжээ. “ITN” телевизийн баримтат киног Их Британи даяар 13 сая хүн үзсэн байна.
Гэсэн хэдий ч Диана тэр орой Лондоны Серпентин галерейд болсон хүлээн авалтад тус даашинзыг өмсөж очсон юм. Эл дааншинз нь хааны гэр бүлийн ёс журмыг зөрчсөн байсан тул Их Британийн поп соёлын мартагдашгүй мөч болж “өшөө авалтын даашинз” гэдэг нэртэй болсон байдаг.
