Найруулагч Брэди Корбет дараагийн бүтээл болох “The Origin of the World” киноныхоо зураг авалтыг эхлүүлжээ. Тус кинонд Майкл Фассбендер, Кейт Бланшетт, Селена Гомес, Жо Элвин, Сэди Совералл нар гол дүрүүдэд тоглож байна.
Киноны зураг авалт Өмнөд Африкт эхэлсэн бөгөөд одоогоор “Salt Flats” гэсэн ажлын нэр ашиглаж байгаа аж. Үйл явдал голчлон 1970-аад оны Хойд Калифорнид өрнөх боловч түүх нь 19 дүгээр зуунаас өнөөг хүртэлх ойролцоогоор 150 жилийн хугацааг хамрах юм байна.
Корбетийн хэлснээр уг бүтээлд Америкийн мистицизм болон оккультизмын түүхийг хөндөх бөгөөд төрөл жанрын хувьд уламжлалт киноны хэв маягаас эрс ялгарах аж. Найруулагч 200 хуудастай зохиол дээр ажилласан бөгөөд киноны үргэлжлэх хугацаа ойролцоогоор дөрвөн цаг байх төлөвтэй байна.
“The Origin of the World” нь Корбетийн дөрөв дэх бүрэн хэмжээний кино бөгөөд өмнөх “The Childhood of a Leader”, “Vox Lux”, “The Brutalist” бүтээлүүдийнх нь дараагийн төсөл юм. Ялангуяа “The Brutalist” кино “Оскар”-ын 10 номинацид нэр дэвшиж, гурван шагнал хүртсэн билээ.
Одоогоор киноны нээлтийн огноо болон дистрибьютер тодорхой болоогүй байна.
