Зураач Б.Сайханбаярын “Ирэх цаг-18” бие даасан үзэсгэлэн ирэх сарын 9-нөөс эхлэн Уран зургийн галерейд дэлгэгдэх гэж байна.
“Ирэх цаг-18” үзэсгэлэн түүний уран зураг болон инстолляцын нийт 30 гаруй бүтээлээс бүрдэж байгаа бөгөөд эдгээрт уран зураг, орон зайн урлагийн бүтээлүүд багтжээ.
Түүний уран зургууд нь өнгөц харахад цөөн өнгөтэй, хийсвэр дүрслэлтэй мэт боловч, биднийг хүрээлэх “саарал” амьдралыг эерэгээр харах гэсэн уран бүтээлчийн өөдрөг хүслийг илэрхийлдэг байна. Б.Сайханбаяр энэхүү үзэсгэлэнгийн талаар "Бидний энэхүү ертөнц нь их түүх, аж байдлыг тээж ирсэн бөгөөд өнөө үе, ирээдүй ч мөн түүний үргэлжлэл байх болно. “Ирэх цаг” үзэсгэлэндээ хүмүүний аж байдал, хүн болон байгалийн харьцаа, хязгааргүй орон зайг өөрийн харж, бодсоноор бүтээлээр дамжуулан илэрхийлэхийг зорьсон юм" гэжээ.
Үзэсгэлэнгийн нээлт 12-р сарын 9-нд 17.00 цагт Монголын Уран Зургийн Галерейд болно. Түүнчлэн энэ үзэсгэлэн 14 хоног үргэлжилнэ.
www.URLAG.mn
