ДБЭТ-ын уран бүтээлчид үзвэрийн 62 дахь улирлын нээлтээ П.И.Чайковскийн “Хунт нуур” балет, Ж.Вердийн “Риголетто” дууриар хийхээр болжээ.
Тодруулбал, ирэх аравдугаар сарын 5, 6-нд “Хунт нуур” балетын тоглох бол аравдугаар сарын 12, 13-нд “Риголетто” дуурийг толилуулах юм.
П.И.Чайковскийн “Хунт нуур” балетыг манай дуурийн театрын тайзнаа 1975 оны зургадугаар сарын 28-нд Төрийн шагналт, Хөдөлмөрийн баатар, Ардын жүжигчин Б.Жамьяндагвын дэглэлт, Ардын жүжигчин Ж.Чулууны удирдлагаар тоглож, тайзны ерөнхий зураачаар Ардын зураач Ч. Гунгаасүх ажиллаж байв. Харин энэ удаа удирдаачаар Т.Гэрэлцэцэг, хөтлөх найруулагчаар Т.Ганбаяр нар ажиллах бөгөөд гол дүрд ДБЭТ-ын тэргүүн гоцлооч О.Анужин, Б.Марал, тэргүүн гоцлооч А.Эрдэнэболд, Б.Дөлгөөн нар бүжиглэнэ.
Харин нэрт хөгжмийн зохиолч Ж. Вердий “ Риголетто” дуурийг ДБЭТ-ын тайзнаа 1987 оны нэгдүгээр сарын 10-нд анхлан тоглож байжээ. Энэ удаа гурван бүлэг, дөрвөн үзэгдлээс бүрддэг эл дуурийг Ардын Зураач Ч.Гунгаасүх агсаны 80 жилийн ойд зориулж тоглох бөгөөд удирдаач Ц.Тэлмүүн-Очир дохих юм байна.
