“Mxrningstar” хамтлаг анхны тоглолтоо ирэх арваннэгдүгээр сарын 22-нд 21.00 цагаас “Корпорэйт” зочид буудалд хийх гэж байна.
Тус хамтлагийнхан эл тоглолтынхоо талаар “Бидний анхны “Хүн” цомог, анхны уг тоглолт бол нислэг, нисэж чөлөөлөгдөх үйл явц. Өөрөөсөө, өнгөрснөөс, эдүгээх бодит байдлаас. Нислэг бүр амжилтад хүрэхгүй, заримдаа унана, эргээд босно, ахиад оролдоно. Гэхдээ нисэх, чөлөөлөгдөх гэсэн хүсэл эрмэлзэл зогсохгүй. Нислэг бол салхи шуурга, татах хүч гээд гадаад ямар нэг хүчтэй эсвэл өөртэйгөө ч хийх тэмцэл мөн. Нөгөө талаараа хүн бодит ертөнцөд хэзээ ч бүрэн чөлөөлөгдөж нисэж чадахгүй. Тэгэхээр нислэг бол зөвхөн төсөөлөл, мөрөөдөлд эсвэл ид шидийн хүчээр л бүтэх зүйл” гэсэн.
Тоглолт хоёр хэсгээс бүрдэх бөгөөд эхний хэсэгт Morningstar-ын дуунууд, хоёрдугаар хэсэгт “Mxrningstar” хамтлагийн “Хүн” цомгийн уран бүтээлүүдийг толилуулах юм. Тоглолтын тасалбарыг shoppy.mn-ээс авах боломжтой.
Ташрамд сонирхуулахад, “Mxrningstar” хамтлагийн “Хүн” цомог энэ аравдугаар сарын 22-нд худалдаанд гарч, хөгжмийн платформууд дээр байршсан. Тэгвэл одоогийн байдлаар “Хүн“ цомгийн бүх дуу “Apple music chart“-ийн шилдэг 100-д багтаж байна.
“Хүн” цомгоо нэрлэсэн “Хүн дууны клипийг хүргэе.
