Соёл, спорт, аялал жуулчлал, залуучуудын яам, Монгол Улсын шинжлэх ухааны академийн Хэл зохиолын хүрээлэн, Соёл, яруу найргийн академи, Монголын Урчуудын эвлэл, “Бичиг соёл” галерей хамтран “Монголчуудын хэрэглэж ирсэн бичиг үсгийн дурсгалууд” монументал урлагийн эскиз зургийн уралдаан зарлалаа.
Монголчууд түүхэндээ арав гаруй бичиг үсгийг хэрэглэж ирсэн өнө эртний бичиг үсгийн уламжлал, их түүхтэй язгуур үндэстэн билээ. Монгол Улсын Засгийн газраас 2024 оныг “Үндэсний бичиг, соёлын жил” болгон зарласнаас гадна үндэсний бичиг, соёлын түүхэнд холбогдох “Чингисийн чулууны бичиг”-ийн 800 жил, “Цогтын хадны чулуу буюу Дуутын хар чулууны бичээс”-ний 400 жилийн ойг энэ онд тэмдэглэн өнгөрүүлэхийг Засгийн газрын 2023 оны 394 дүгээр тогтоолоор баталсан.
Энэ хүрээнд Монгол үндэстний бичиг соёлын арвин өв уламжлалыг хойч үедээ мэдүүлэх, залуу уран бүтээлчдийн шинэлэг санаа, санаачилга, авьяас чадварыг нийтэд таниулах зорилгоор “Монголчуудын хэрэглэж ирсэн бичиг үсгийн дурсгалууд” монументал урлагийн эскиз зургийн уралдааныг зарлаж байна.
Монументал урлагийн уран бүтээлчид, зохион бүтээгчид, зураачид, график дизайнерууд та бүхнийг өргөнөөр оролцохыг уриалж байна.
