“Монгол киноны баримтын товчоон” номын нээлт, уулзалт маргааш 2024.11.28/ 11.00 цагт Монголын театрын музейд болно.
1965 онд БНМАУ-ын Соёл гэгээрлийн яамнаас 1928-1960 оны хооронд соёл, урлагийн талаарх судалгаа, нийтлэл, сэтгүүл зүйн эх материалуудыг судалж, эмхэтгэсэн бөгөөд түүнээс хойш энэ төрлийн судалгаа огт хийгдээгүй өдийг хүрчээ. Тэгвэл Монголын урлагийн зөвлөл нь Монгол улсын Хөдөлмөрийн баатар, кино найруулагч Г.Жигжидсүрэн, монгол кино судлаач Д.Цэцэг нартай хамтран “Монгол киноны баримтын товчоон (1921-2024)” номыг эмхэтгэн гаргаж, олон нийт, судлаач, оюутан залууст танилцуулахад бэлэн болоод байна.
Кино урлагийн талаарх ойлголт, мэдээллийг хойч үедээ уламжлуулан үлдээх, монгол киноны шүүмж судлалын эх сурвалжийг баяжуулах зорилгоор сонин, сэтгүүл, цахим орчинд нийтлэгдсэн бичвэрүүд болон 2000 оноос хойш хийж буй судалгаанд үндэслэн эл номыг бүтээсэн аж. Энэхүү ном нь нийт зургаан бүлэгтэй бөгөөд дараах агуулгаас бүрдэнэ.
Үүнд:
- XX, XXI зууны уран сайхны болон баримтат, хүүхэд, хүүхэлдэй, олон ангит кино, Монгол уран бүтээлчид оролцсон гадаад киноны тухай 600 орчим шүүмж нийтлэл
- Гадаадын болон дотоодын уралдаан, кино наадам, Монгол уран бүтээлчдийн шагнал хүртсэн кино наадмын тухай
- 700 орчим уран бүтээлчдийн хөрөг, ярилцлага
- 1940 оноос хойш хэвлэгдсэн ном бүтээлийн жагсаалт
- 1936 оноос өнөөдрийг хүртэл “Монгол кино” үйлдвэр, студи продакшнд бүтээгдсэн 1.100 орчим киноны жагсаалт
- 2017 оноос IPTV-д бүртгэгдсэн 400 орчим кино контентын жагсаалт
