2002 онд Хөгжим бүжгийн коллеж төгссөнөөсөө хойш өнөөг хүртэл Үндэсний урлагийн их театраар овоглож буй бүжигчин Ж.Мандухай ардын уламжлалт монгол бүжгийн урлагийг олон улсад сурталчлахад жинтэй хувь нэмэр оруулж буй уран бүтээлч юм. Тэрбээр бага ангиасаа Дорноговийн Зүүнбаянгийн Соёлын ордны дэргэдэх “Говийн наран” бүжгийн дугуйланд суралцаж, удалгүй Хөгжим бүжгийн коллежид шалгуулж тэнцсэнээр Ардын багш, Гавьяат жүжигчин Г.Долгорсүрэнгийн шавь болж, мэргэжлийн бүжигчин болох замнал нь эхэлжээ. Өнөөдрийг хүртэл тэрбээр энэ хугацаанд бүжгэн жүжгийн 100 гаруй бүтээлд гоцлол болон туслах дүрийг амжилттай бүтээсэн байна. Гавьяат жүжигчин Ж.Мандухай театрынхаа уран бүтээлийн зэрэгцээ бие даасан уран бүтээлээ туурвихаас гадна “Эрхэмсэг” бүжгийн хамтлагийн бүрэлдэхүүнд мөн багтдаг. Үндэсний урлагийн их театрын дэргэд байгуулагдсан мэргэжлийн бүжгийн эл “Эрхэмсэг” хамтлагийн 15 жилийн ой тун удахгүй тохионо. Эл ойгоо угтан тус хамтлагийнхан бие даасан тав дахь тоглолтоо “Эрхэмсэг оршихуй” нэртэйгээр арванхоёрдугаар сарын 22-нд “Хүрээ Майдар дуган”-д хийхээр болжээ.
