“Туг” пикчерс, “Номадиа” пикчерс хамтран “Амьдрах сайхан” олон ангит кино бүтээснээ үзэгчдэд хүргэх гэж байна. Эл кинонд олон чадварлаг уран бүтээлчид хамтран тоглосны онцлох нь УДЭТ-ын жүжигчин Д.Асардарь.
Д.Асардарь СУИC-ийг 2015 онд Гавьяат жүжигчин Л.Дэмидбаатарын удирдлагад төгсөж, 2016 онд УДЭТ-т хөл тавьмагцаа “Жаргаагүй нар”, “Ану хатан”, “Ромео, Жульетта” зэрэг жүжигт оролцон тоглож, улмаар “Адууны түүх” жүжгийн Хулангоо, “Надаар тоглосон хайр” жүжгийн Цолмонтамир, “Надтай үлдээч” жүжгийн Нандин, “Бүсгүйн зурвас” жүжгийн Номин, “Хаадын хаан: Андгай” жүжгийн Сочихэл эх, “Сычуаны сайн хүн” жүжгийн Худалдаачин эмгэн, “Анна Каренина” жүжгийн Сорокин вангийн гүнжийн дүрээр тайзнаас үзэгчидтэй уулзаад буй. Мөн “Орфей” театрын бүтээл, С.Жаргалсайханы “Шөнө дундын бүжиг” жүжгийн Шубирад ч “хувираад” амжсан. Түүнчлэн тэрбээр өнгөрсөн онд “Гэгээн Муза” олон улсын театрын наадмын Хүүхдийн жүжгийн төрөлд “Миний аав супер баатар” жүжгийн Шоргоолж хүүгийн дүрээрээ шилдэг эмэгтэй гол дүрийн жүжигчний шагналыг хүртсэн юм.
