Өнгөрсөн сард алдарт “American psycho” киноны шинэчилсэн хувилбар хийхээр болсоноо “Lionsgate” кино компани мэдэгдсэн. Энэхүү мэдээлэл цацагдсанаас хойш гол дүрд хэн тоглох тухай таамаг кино сонирхогчдын дунд дэгдэж, Жейкоб Элорди, Жейк Жилленхол, Арми Хаммер зэрэг чадварлаг жүжигчдийн нэрс дурдагдаж байв.
Тэгвэл “Lionsgate” кино компанийн зүгээс тус бүтээлд “Elvis”, “The dune: Part two” зэрэг кинонуудаараа алдартай жүжигчин Остин Батлер тоглох болсон тухай албан ёсоор мэдэгдлээ. Харин киног “Call me by your name”, “Challengers” зэрэг бүтээлүүдийг найруулсан Лука Гуаданьино найруулахаар болсон байна. Тэрбээр киноны анхны хувилбарын хэв маягийг дагахаас илүүтэй “American psycho” киноны эх зохиол буюу Брет Истон Эллисын 1991 онд гаргаж байсан ижил нэрт номонд тулгуурлан шинэчилсэн хувилбарыг хийхээр төлөвлөж байгаа гэнэ. Ингэхдээ үйл явдлыг орчин үеийн хэв маягтай уялдуулж, илүү өвөрмөц, шинэлэг өнцгөөс харуулахаар зорьж байгаа гэдгээ мөн онцолжээ.
Эргэн сануулахад, “American psycho” кинонд гаднаасаа баян, эрх мэдэлтэй, боловсон залуу мэт харагддаг боловч үнэндээ нарциссист зан чанартай, цуврал алуурчин Патрик Бейтманы тухай өгүүлдэг. Эл киног үзэгчид алдарт жүжигчин Кристиан Бейлийн тоглосноор эчнээ мэдэх юм. Мөн тус кинонд 1980-аад оны үеийн АНУ-ын нийгмийн харанхуй, бүрхэг талуудыг сонирхолтойгоор тусгаж, харуулсан байдаг.
