ДБЭТ-ын уран бүтээлчид шинэ уран бүтээл болох “Тэнгэрийн элч” дуурийг үзэгчдэд хүргэх гэж байна. Энэхүү уран бүтээлийг нийслэлийн 385 жилийн ойг тохиолдуулан нийслэлийн Засаг даргын Тамгын газар, нийслэлийн Соёл урлагийн газрын дэмжлэгтэйгээр арванхоёрдугаар сарын 28, 29-нд толилуулах аж.
“Тэнгэрийн элч” дуурийн зохиолчоор Л.Даваасүрэн Б.Энхтуяа, хөгжмийн зохиолчоор Ардын жүжигчин А.Энхтайван, ерөнхий продюсероор Гавьяат жүжигчин, ДБЭТ-ын захирал Д.Алтанхуяг, ерөнхий найруулагчаар С.Баттулга, ерөнхий удирдаачаар Ц.Тэлмүүн-очир, ерөнхий хормейстероор Н.Дашбямба, балетмейстераар М.Нямтайван нар ажиллаж байна.
Түүхэн сэдэвт “Тэнгэрийн элч” дуурь нь Тэмүжин эцэг Есүхэй баатраас үлдээсэн өв болох найман шарга морьдоо алдаад нарийн өвсний налархай даган хайж явсаар хөхүүрийн талд хүрч Аралуд аймгийн Наху баяны хүү Боорчтой анх танилцаж анд барилдсан цагаас хойш их Монгол улсыг нэгтгэн төр улсыг төвшитгөх хүртэл хамт зүтгэж мөнх тэнгэрийн элч хэмээн өргөмжлөгдөж явсан Боорчийн үнэнч сэтгэл, эр хүмүүний нөхөрлөлийг харуулсан түүхэн сэдэвт бүтээл юм.
