“Orange” энтертайнмент, VOO хамтран “Амьдрал” олон ангит киног үзэгчдийн хүртээл болгож байна. Эл цувралын гол дүрд Монголын кино урлагт өөрийн өвөрмөц төрх, гоо үзэсгэлэн, авьяас чадвараараа нэгэн өнгийг цогцлоосон жүжигчин Р.Анхням тогложээ.
Монголын хамгийн олон удаа олон ангит кинонд гол дүр бүтээсэн эмэгтэй жүжигчин гэгддэг тэрбээр СУИС-ийн оюутан ахуйдаа буюу 1999 онд “Совингийн савдаг” кинонд тоглож уран бүтээллийн гараагаа эхэлжээ. Түүнээс хойш “Хүнд битгий хэлээрэй”, “Танихгүй охины захидал”, “Өвлийн уянга”, “Салхины хаан”, “Мөрөөдлийн хөлөг онгоц”, “Сийлэн бөөр”, “Уулын Төмөр”, “Уучил”, “Чингис хаан”, “Сүүлчийн хөхөөн дуу”, “Тушаал”, “Үнсэлт”, “Надтай гэрлээч”, “2 шөнө 3 өдөр”, “Угалз хээт эмээл”, “Гаадаа мээрэн”, “Сексийн эрх чөлөө”, “Хайрын эрэлд”, “Цагдаагийн тангараг”, “Чонон сүлд”, “Хайр эргэсэн хавар”, “Чингисийн хүүхдүүд”, “Үүлэн хээтэй орчлон”, “Дасгалжуулагч”, “Урт өдрүүд” зэрэг дотоодын болон олон улсын бүрэн хэмжээний болон олон ангит уран бүтээлийн гол дүрд тогложээ.
Яг одоо үзэгчдэд хүрч буй “Амьдрал” олон ангит кинонд жүжигчин Р.Анхням мэс заслын эмч Нарангэрэл гэх дүрд тоглосон бөгөөд киноны гол үйл явдал нь хамаг амьдралаа гартаа атгасан гэж бодож байсан мэс заслын эмч Нарангэрэл болон түүний гэр бүлийн эргэн тойронд өрнөдөг байна. Киног нийт 211 хоногийн хугацаанд 300-гаад хүний хүч хөдөлмөр, сэтгэл зүрхээр бүтээсэн ажээ. “Амьдрал” олон ангит киноны ангиудыг долоо хоног бүрийн пүрэв гарагт VOO-ээс үзэх боломжтой.
