Хорин нэгдүгээр зууны эхэн үеийн “Монголын дүрслэх урлаг дахь хөрөг зураг” үзэсгэлэнг Монголын урчуудын эвлэлийн галерейд нээлээ.
Монголын дүрслэх урлаг нь энэ зууны эхэн үеэс олон төрөл, чиглэл, урсгалаар баяжин хөгжиж байна. Үзэсгэлэнгийн танхимд уламжлалт уран зураг, баримал, гэрэл зураг, орчин үеийн урлаг буюу видео арт хэлбэрээр бүтээлээ туурвидаг 100 гаруй уран бүтээлчийн 160 гаруй бүтээлийг дэлгэжээ.
Тус үзэсгэлэнд оролцож буй уран бүтээлч Г.Сэр-Од, “Хөрөг зураг нь бодит хүний төрх байдлыг уран сайхны дүрээр дамжуулан гаргадаг. Миний номын ах, зураач Х.Ууганбаяр түүхэн зургаар дагнан бүтээлээ хийдэг. Түүний хөргийг өөрийнх нь зурсан “Айсуй” бүтээлийнх урд зурсан. Энэ зургийг зурж байхдаа юу мэдэрч, бодож байсан тэр бүгдийг нь шингээхийг хичээсэн” хэмээн өгүүллээ.
Мөн, уран бүтээлч Б.Энхчулуун тус үзэсгэлэнд видео арт, баримал хоёрыг хослуулан бүтээсэн “Тархи угаагчид”, “Далигийн сэрэхийн өмнөх зүүд” бүтээлээрээ оролцож байна. Түүний хувьд уран зураач мэргэжилтэй ч сүүлийн үед баримал сонирхох болсон. Иймдээ ч баримал, видео арт хослуулан “Тархи угаагчид” бүтээлээ хийсэн байна. Ингэхдээ, дэлхийн шилдэг, улс төрч, илтгэгч Уинстон Черчилль, Адольф Гитлер, Иосиф Сталин зэрэг зургаан хүний баримлыг бүтээж, магнай хэсэгт нь жижиг дэлгэц байрлуулсан. Үүнийг удаан ширтвэл ховсдуулж байгаа мэт мэдрэмж төрүүлнэ.
Харин, “Далигийн сэрэхийн өмнөх зүүд” бүтээлээ мод, төмрийн холимог аргаар 2016 онд урласнаа Б.Энхчулуун тайлбарлаад, “Испанийн XX зууны хамгийн нөлөө бүхий уран зураач Салвадор Дали нь зургандаа урт нэр өгдөг онцлогтой. Түүний нэг бүтээл нь “Анар жимсийг тойрон эргэж буй зөгийний сэрэхийн өмнөх зүүд” нэртэй байдаг юм. Би үүнээс санаа авч энэ бүтээлээ нэрлэсэн. Ер нь бүтээлдээ алдар нэртэй хүмүүсийн дүрсэлж онцлох дуртай” хэмээсэн юм.
“Монголын дүрслэх урлаг дахь хөрөг зураг” үзэсгэлэнгээс дүрслэх урлаг дахь хөрөг зургийн хөгжил ямар шатандаа явж байгааг харах боломжтой. Үзэсгэлэнгийн үеэр хөрөг зургийн талаар нээлттэй хэлэлцүүлэг өрнүүлж, уран зургийн мастерууд ирж лекц уншиж, хичээл заах юм.
Үзэсгэлэн энэ сарын 15-ныг дуустал үргэлжилнэ.
