“Анирлагч” кино Монголын кино урлагт шинэчлэл авчирна Телевизийн шилдэг найруулагч Д.Сангибат кино урлагт хүч түрэн орж ирлээ. Нэгэн үе Монголын кино урлаг уналтанд орж ахмад үеийнхний хийдэг байсан сайхан кино дэлгэцнээ гарахаа байгаад нэлээдгүй хугацаа өнгөрсөн. Кино урлагын уналтанд орсон шалтгааныг нөгөө л хөрөнгө мөнгө, зах зээлийн нийгэмтэй холбон тайлбарладаг.
Тэгвэл зах зээлийн нийгэм хөл дээрээ тогтож эхэлсэн энэ үед уналтанд ороод байсан гэх “Монгол кино” ёстой л ар араасаа цувран гарч нэг хэсэгтээ бид үзэж харах юм ихтэй болсон гэхэд хилсдэхгүй. Гэхдээ сайны хажуугаар саар гэгчээр….. Борооны дараах мөөг шиг гарч эхэлсэн Монгол кинонуудын чанар нь мөн л муудсаар, барууны болон, азийн кинонуудаас хуулдаг муу зан сурч эхлээд байна. Нөгөө бидний кино урлагаас таашаал авдаг байсан Монгол зохиол, Монгол хийцтэй кино сүүлийн жилүүдэд бараг л гарахаа болиод байгаа. Энэ нь бас л хоёр талтай. Нэг хэсэг нь үнэхээр кино урлагыг хөгжүүлье гэсэн сэтгэл зүрхтэй байхад, нөгөө хэсэг нь зөвхөн кино урлагаар бизнес хийж мөнгө олох зорилгыг урдаа барьдаг болсон.
Тэгвэл жинхэнэ Монгол зохиол, хуучны сайхан киног санагдуулах нэгэн шинэ уран бүтээл тун удахгүй дэлгэцнээ гарч эхлэх гэж байгаа тухай мэдээ сонсогдох боллоо. Энэ бол телевизийн найруулагчаас кино урлагт хүч түрэн орж байгаа Д.Сангибатын найруулсан “Анирлагч” МУСК юм. “Анирлагч” МУСК-ны зохиолыг Д.Энхбаатар, Р.Оюунгэрэл нар бичсэн бол киноны продюссероор МУСТА Р.Адъяа ажилласан байна. “Анирлагч” МУСК нь болсон үйл явдлаас сэдэвлэн бүтээсэн бөгөөд кино сонирхогчидод жинхэнэ Монгол киноны хийц, ур чадварыг харуулж чадсан бүтээл болсон гэдгийг олон уран бүтээлчид хэлж байгаа юм. Түүнчлэн киноны Ерөнхий найруулагчаар ажилсан Д.Сангибат нь МҮОНРТ-ийн “Үдшийн хэмнэл” хөтөлбөрийн найруулагч, мөн түүнчлэн NBS телевизийг чадварлаг сэтгүүлч агсан С.Наранбаатартай хамтран үүсгэн байгуулж байсан нэгэн юм. Ямартай ч телевизийн шилдэг найруулагч Д.Сангибат Монголын кино урлагт хүч түрэн орж ирж байгаагаа “Анирлагч” киногоороо харуулах гэж байна.
