УДЭТ ирэх гуравдугаар сарын 5-наас Нобелийн шагналт зохиолч Южин О’Нилийн “Хайлаас модны доор чамайг хүлээнэ” уянгын драмын жүжгийг Төрийн соёрхолт, Урлагийн гавьяат зүтгэлтэн Н.Наранбаатарын найруулгаар толилуулна. Эл жүжгийн гол дүрд УДЭТ-ын жүжигчин О.Долгор тоглоно.
О.Долгор Д.Жигжидийн нэрэмжит Кино Урлагийн дээд сургуульд Ардын жүжигчин Б.Мөнхдорж найруулагчийн удирдлагад суралцан тайз, дэлгэцийн жүжигчин мэргэжлээр 2006 онд төгсжээ. Тэрбээр сургуулиа төгсөөд “Төрийн дайсан” бүрэн хэмжээний уран сайхны кино, “Бид дөрвийн хайр” телевизийн олон ангит кинонд тоглон уран бүтээлийн гараагаа эхэлж, үзэгчдэд танигдаж байв. Харин өдгөө дэлгэцийн урлагт дурлагсад түүнийг “Үл таних эмэгтэй”, “Эзэнгүй бөгж”, “Ану хатан”, “Хоёулаа унтах уу”, “Муу нүүрт”, “Танхай тээгч”, “Ар хударга”, “Хоёр ертөнц”, “Дурлалын гэмт хэрэг”, “Зүрхний хилэн” гэх зэрэг дэлгэцийн уран бүтээлүүдэд бүтээсэн дүрүүдээр нь андахгүй мэднэ.
2022 оноос О.Долгор УДЭТ-аар “овоглож” буй. Энэ хугацаанд тэрбээр Л.Толстойн “Анна Каренина”, Б.Цогнэмэхийн “Хаадын хаан: Андгай”, У.Шекспирийн “Ромео, Жульетта”, Л.Өлзийтөгсийн “Бүсгүйн зурвас”, Б.Брехтийн “Сычуаны сайн хүн”, Б.Цогнэмэхийн “Тэнгэрийн хүү” зэрэг дэлхийн сонгодог болон түүхэн, орчин үеийн жүжгүүдэд тогложээ.
