Сэтгүүлч А.Гантуяа “Шинэ ээжийн тэмдэглэл” номоо “өлгийдлөө”.
Тэрбээр “Эл номд миний туршлага, дурсамжаас гадна шинжлэх ухааны үндэслэлтэй үнэн, зөв мэдээлэл түгээхээр 12 мэргэжилтний зөвлөгөөг багтаасан билээ. Үүний цаадах хамгийн чухал зорилго бол “хүүхдээ эрүүл өсгөх” юм. Аав, ээж бидний дэргэд ирээдүйн монгол иргэн өсөж буй” гэсэн юм.
“Шинэ ээжийн өдрийн тэмдэглэл” ном нь залуу ээжийн жирэмсэн үеэс хүүхэд хоёр нас хүртэлх туршлага, дурсамжид суурилсан ном аж. Энэ нь ээжүүдийн сэтгэл санаанд дэм “хань” болох зорилготой.
Түүнчлэн 12 мэргэжилтний зөвлөгөөг ярилцлага хэлбэрээр багтаажээ. Тухайлбал, хөл хүнд үеийн ээжийн сэтгэл зүй, биеийн эрүүл мэнд, амаржихад бэлтгэх, хүүхдийн өдөр тутмын арчилгаа, хүүхдийн нойр, нэмэгдэл хүнстэй танилцах үе зэрэг хүүхэд өсгөх болон гэр бүлийн харилцаанд хамгийн чухал гэж үзсэн сэдвүүдээр мэргэжлийн хүмүүсийн зөвлөгөөтэй аж. Зөвлөхүүдээс дурдвал, сэтгэл зүйч Ж.Үйлст, Г.Маралгуа, эх барих эмэгтэйчүүдийн эмч Ц.Одонзул, хүүхдийн хоол зүйч Б.Номин, шим тэжээл судлаач, “Сахар” номын зохиогч Л.Энхзул зэрэг 12 мэргэжилтэн хамтарч ажиллажээ.
