Жүжигчин Батушка буюу Т.Баттулга даруухан мөртлөө өөрт оногдсон дүрдээ чамбай тоглодог уран бүтээлч. Тэрбээр хошин урлаг ид хүчээ авч байх үед буюу 2006 онд СУИС-ийг төгсмөгцөө “Шинэ үе” продакшнаас уран бүтээлийн гараагаа эхэлж, өдгөө “Мөрөөдлийн театр”-аар “овоглож” буй.
Дэлгэцийн уран бүтээлийн гараагаа “Буруу эргэлт” киногоор эхэлсэн түүнийг үзэгчид өдгөө “Эх орон дуудаж байна”, “Учрал”, “Төгс бүсгүйн зууч”, “Карантинд 21 хоног”, “Хамгийн чурал нь”, “Хадмын хайр”, “Гадны нөлөөгүй” гэхчилэн бүрэн хэмжээний уран сайхны кино, “Улаанбаатар, би чамд хайртай”, “Нарны жим” зэрэг телевизийн олно ангит кинонуудад бүтээсэн дүрүүдээр нь андахгүй.
Харин тайзны уран бүтээлийн тухайд тэрбээр “Шинэ үе” продакшны шоу тоглолтуудаас гадна “Мөрөөдлийн театр”-ын уран бүтээлүүд, онцолбол 2019 онд “Дундын бүсгүй”, 2020 онд “Галзуу хот” шоу драмуудаар үзэгчидтэй “уулзсан”. Өнгөрсөн онд Т.Баттулга “Тод хувцастай эмэгтэй” уянгын драмын жүжгээр тайзны уран бүтээлдээ эргэн ирсэн юм. Тэгвэл ирэх гуравдугаар сарын 5-наас “Мөрөөдлийн театр”-ын тайз, дэлгэцийн 24 дэх уран бүтээл болох “Samsara-Тэртээх хоёр зүрх” драмын жүжгийн дүрээр үзэгчидтэй тайзнаас “уулзах” юм.
