Маршал арт галерейд “Сар шинийн өнгө” нэртэй үзэсгэлэн гарч байна. Энэ үзэсгэлэнг Монголын урчуудын эвлэлийн ахмад уран бүтээлчид хамтран гаргажээ. 1942 онд Монголд мэргэжлийн дүрслэх урлагийн байгууллага байгуулагдаж, өдгөө 70 гаруй жилийг үджээ. Өнгөрсөн 70 жилийн түүхийг оюуны болон гарын ураараа урлан бичилцсэн ахмад уран бүтээлчид өдгөө ч бийр будгаа нийлүүлэн, бүтээлээ туурьвисаар байгаа.
МУЭ-ийн гишүүн зураач С.Алтангэрэл, урлагийн гавьяат зүтгэлтэн Ч.Батмөнх, Г.Дунбүрээ, Ц.Байды, зураач З.Доржжанцан, Р.Лхамсүрэн, Д.Уранчимэг, Н.Оросоо, П.Цогзол, Э.Сүхээ, Х.Содномцэрэн нар үзэсгэлэнд бүтээлээ дэлгэжээ. Мөн Монгол улсын ардын зураач, Урлагийн гавьяат зүтгэлтэн, Франц улсын ардын зураач Б.Чогсомын бүтээлүүд бий гэнэ.
Энэ сарын 13-ныг хүртэл олон түмэнд нээлттэй байх үзэсгэлэнд нэр дурдсан уран бүтээлчид тосон будгийн зургууд, хүрэл баримлуудаа анх удаа дэлгэн үзүүлж байна.
Энэ нь Тийн ялгуусан хэмээх модон морин жилийн босгон дээр монголын шинэ үеийн дүрслэх урлагийн түүхийг бичилцсэн 11 ахмад уран бүтээлчийн хамтарсан анхны үзэсгэлэн юм.
Ахмад уран бүтээлчид эх орныхоо байгаль, түүх соёл, аж амьдралыг тусган харуулсан түүхэн бүтээлүүдийг дэлгэн үзүүлсэн үзэсгэлэн нээх нь уламжлал болон тогтоод байна.
