Зохиолч Б.Сарантуяа “Самсара-Хүслэнт ертөнц” шинэ номоо “өлгийдлөө”. Тэрбээр сүүлийн гурван жилийн эрэл хайгуул, эмзэглэл мэдрэмж, эморол ганцаардал, өөрийн дотоод ертөнцийн гүнээс орчлонгийн хязгаар хүртэл аялах гэсэн чин хүсэл бүхнээ эл номондоо шингэжээ.
Сайтар ажиглан харж чадах юм бол санаандгүй тохиолдол гэж хорвоо ертөнц дээр байдаггүй агаад эртэн цагийн болзол учирлаар хүмүүс хоорондоо уулзаж, биесийнхээ зүрх сэтгэлд жаргал зовлонгийн үрийг тарьсаар явдаг. Энэ номонд удахгүй тайзнаа тавигдах шинэ жүжгийн гол дүрийн жүжигчдэд тохиолдсон хачин жигтэй явдлуудаар дамжуулан өнгөрсөн, одоо, ирээдүй хэмээгч цаг хугацаа, орон зай, толины тусгал мэт бидэнтэй айлсах зэрэгцээ ертөнцийн анир дор санаж сэрж байгаа тэдний сүнсний ухамсрын сэрэлтийн тухай өгүүлнэ.
Самсара хэмээх үхэл амьдралын мөнхийн тойргоос хагацаж үл чадах үзэгдэлт орчлонгийн үйлийн үрийн барилдага бүхэн нь тэднийг энэхүү тайзан дээр нэгэн цагт, нэгэн жүжгийн гол дүрээр уулзуулсан юм. Үнэндээ бол чөлөө учралт хүмүүний төрлийг олно гэдэг нь бидэнд ч санаж сэрэх, ухаарч сэхээрэх үүлэн чөлөөний нар шиг цаг хугацаа байж болох юм. Хэрэв тийм бол та ч гэсэн энэ зохиолын гол дүрийн жүжигчидтэй хамт тэдний үйлийн үрийн барилдлагаар бүтсэн үзэгдэлт жүжгийн өрнөл дунд санаж сэрж магадгүй юм.
Шашин хийгээд шинжлэх ухааны уулзвар цэг дээрээс үнэн мөнийг эрэлхийлэн бичсэн энэ ном танд амьдрана гэдэг амьд байхын нэр биш амжиж сэрэхийн нэр байж болохыг сануулах аж.
Ташрамд дурдахад, зураач О.Золбоотөгөлдөрийн хоёр бүтээл “Самсара-Хүслэнт ертөнц” номыг чимжээ.
