Жүжигчин Н.Баясаа 2021 онд С.Батзориг, Г.Лхагвацэрэн, У.Цогтбаяр, Р.Сүхболд нартай хамтран “In da house”, 2022 онд “In da house: Come back” адал явдалт, инээдмийн уран сайхны киног үзэгчдэд хүргэж байв. Харин энэ удаа “In da house-3: in Korea” киног БНСУ-ын уран бүтээлчидтэй хамтран бүтээснээ ирэх гуравдугаар сарын 6-наас үзэгчдэд хүргэж гэж байна.
2004 онд СУИС-ийг төгсөж, 2009 оноос “Х ТҮЦ” продакшнаар овоглосон Н.Баясааг үзэгчид өдгөө андахгүй. Тэрбээр “Х ТҮЦ” продакшны тайзны уран бүтээлүүд, шоу тоглолтуудад оролцсоноос гадна “Базарваань”, “Өвлийн инээмсэглэл”, “Улаанбаатарт нэг удаа”, “Солонгос драма Монголд”, “Худалдагч охин”, “Бяцхан чөтгөрийн хүсэл”, “Монгол бро”, “Цагаан эрэг”, “Hacker”, “Эмэгтэйн кейс”, “Хэрмэл жүжигчид” зэрэг уран сайхны кинонд тоглосон юм. Түүнчлэн дэлхийн 21 оронд франчайз эрхээр бэлтгэн хүргэдэг “Бурхны авралаар чи ирлээ” шоуны нэвтрүүлгийн үндсэн жүжигчнээр төдийгүй зохиолчоор ажиллажээ. Мөн түүний жүжигчин С.Батзоригийн хамт “Өрийн дэвтэр” влог бэлтгэн хүргэдэгт нь үзэгчид хэдийн дуртай болоод буй.
