Өнөөдөр УДЭТ-ын жүжигчин Г.Отгонцэцэгийн төрсөн өдөр тохиож байна.
Г.Отгонцэцэг нь СУИС-ийн оюутан ахуйгаасаа “Хувьсал” продакшнд ажиллаж, улмаар 2008 онд УДЭТ-ын босгыг давсан юм. Түүнээс хойш тэрбээр С.Жаргалсайханы “Шөнө дундын бүжиг” жүжгийн Шубира, В.Хюгогийн “Парисын Дарь эхийн сүм” жүжгийн Эсмиральдо, Г.Ибсений “Нора” жүжгийн Нора, Б.Галааридын “Эсрэг дурлал” жүжгийн Фүжицүбо хатан, У.Шекспирийн “Ромео, Жульетта” жүжгийн хатагтай Капулетти, Б.Брехтийн “Сычуаны сайн хүн” жүжгийн Шин хатагтай, Л.Н.Толстойн “Анна Каренина” жүжгийн Бетсигийн найз, Б.Цогнэмэхийн “Тэнгэрийн хүү” жүжгийн Шунхуй хатан зэрэг дэлхийн болон Монголын шилдэг 40 гаруй тайзны уран бүтээлд гол болон туслах дүрд тогложээ.
Түүнчлэн “Боолын гэрээ”, “Үл таних эмэгтэй”, “Орхидос”, “Амьдралын амт”, “Аюултай харилцаа”, “Зургаа дахь хүсэл”, “Нинжин сэтгэл”, “Төгсгөл” зэрэг уран сайхны киноны гол дүрд тоглосныг нь үзэгчид андахгүй мэднэ.
Тэрбээр өнгөрсөн оны есдүгээр сард “Ялагчдын цуваа” моно жүжгийн олон улсын фестивальд “Дөргөнэ хатны домог” жүжгээр оролцон шилдэг найруулагчийн шагнал хүртсэн бөгөөд хэдхэн хоногийн өмнө буюу хоёрдугаар сарын 28-нд Төрийн дээд шагнал “Алтан гадас” одонгоор энгэрээ мялаасан юм.
